生活愉快 : 愛文生

 
同食友攪既麻甩局已食左幾場，今日呢局不知不覺已經係食友離港前既最後麻甩局。話曬幾條佬食大排檔，點都要啤啤佢先似樣。
金牌乳鴿皇都算肥美，擺耐左先食都仍然皮脆肉香。
椒鹽雙併叫左鮮魷拼大腸試下。
鮮魷都可以炸得乾身，另大腸夠大條又夠厚身，炸得外脆內軟又有油香，食住大腸隊下啤真係爽。
黑椒薯仔牛柳粒好多檯都叫，所以都叫黎試下。薯仔幾軟熟一咬即開，牛柳粒有點咬口亦有牛味，唔係俾鬆肉粉攻擊到體無完膚個隻level。豉油王虎蝦雖然叫價唔平，不過蝦碌夠大隻，一碟份量都唔少所以都值得捧場。菜膽雞食落都有雞味，不過小第食菜多過食雞。豉椒炒蟶子上檯時仍然非常熱燙，蟶子都食得出係新鮮貨色。
咕嚕肉啖啖肉之外，酸甜味都平衡得幾好。
今晚除左炸大腸外重有一味豉椒炒生腸，呢味野經過爆炒之後又係送酒佳品。
粟米斑塊就好一般，粟米汁唔夠濃比較水汪汪，魚塊亦比較鬆散。食完見到附近有可愛街貓，當然要逗下佢地玩。
在此祝食友以後順風順水，在彼邦生活愉快事事順利。

愛文生
地址：深水埗石硤尾街1號地下B-C號舖
Tel : 2393 9315