回頭太易 : Passepartout

星期六朝早一覺醒來，時間唔上唔落，早餐又太晏午餐又未有得食，唯有飲茶食點心或搵間cafe食下all day breakfast。
走左去佐敦點心店，離遠已見一堆人係門口即轉場，行下行下去左官涌街市附近見到藍色門口，記得成年前都到訪過此店印象還好，唔想去搵其他餐廳就直入坐低。
可能未到午餐時間，店內都是吉檯，不過離開開時已差不多滿座。

本來去cafe應該飲咖啡，但天氣太熱都係想叫解到渴既飲品。
Lime Soda一上手就知夠冰涼，飲落微酸入口清新。
Matcha Latte抹茶鮮奶既抹茶味剛好，鮮奶既奶泡亦夠綿密。

先叫一份Large Plates選擇下既Steveston睇下有幾大碟。結果係如果唔太餓既話，兩人分享下也叫做夠食。

美式班戟睇落唔大，但跟上兩塊就唔算份量少。
班戟厚身食落鬆軟有蛋香，加上牛油及店家既香濃糖槳，班戟吃得十分滿意。
茄汁豆都係食開既味道，而兩塊自家製早餐豬柳扒都係好東西，豬柳扒口感不死實，調味剛好外亦食得到不錯鮮肉味。
薯仔沙律充滿薯蓉薯粒外，店家重煎香先上碟，令薯仔沙律多左變化。
荷包蛋有蛋汁有燶邊已收貨，而碟中比較差既要數到沙律菜，食落帶點苦澀令人卻步。飲品同食物出品都有質素又夠份量，雖然cafe開到成巷成市，但有時都未必想冒險試新店，而且店家menu內重有野想食下，真係回頭太易。

Passepartout
地址：佐敦閩街1號地舖
Tel : 2882 0828