韓國濟州島首爾自駕自由行 Day4 (DW Design Residence, 花蟹堂, Cafe Layered, 風川鰻魚, 橋村炸雞 豬腳小姐)

 
今日一早上機番首爾，朝早係民宿食完尋日買定既麵包做早餐後，即刻開車去機場還車check-in。順利去機場還左車，坐shuttle去terminal寄倉拎登機証，上到機再訓一訓。
終於到首爾，不過天氣麻麻一路落緊雨。
今晚住弘大，除左出入機場方便，買野同食野都一樣咁方便。
呢間DW Design Residence似民宿多過酒店。
去到check-in都冇staff係度。
Common area還可以。
有password就入到房，但其中一間房既窗俾人打開左但閘唔到，雨水係咁飛入間房，唯有急call負責人番黎一係換房一係攪掂隻窗。
另一間房就話左俾錢加床，結果床係有加但唔包被同枕頭之類，最後唯有再加錢。

攪好間房即刻衝去食飯，今餐訂左專食醬油蟹既花蟹堂。
花蟹堂都拎過米芝蓮，質素應該有保證。
大家都堅肚餓，唔使諗一人一個醬油蟹套餐。
前菜個樣好吸引，食落都好對版好好味，唔使送飯都已經食完。
蒸蛋都軟滑又夠熱度。
醬油蟹睇落十分對版，隻隻都有唔少蟹膏。
醬油唔會太甜亦唔會太濃，完全唔會反客為主掩蓋左蟹既鮮味。
蟹肉緊緻食落新鮮，蟹膏軟滑入口甘香，同店家既飽滿飯粒係絕配，食完呢餐大家都好滿意。

填左個鹹胃跟手要食甜品，番左弘大搵左呢間Cafe Layered。
Cafe Layered有兩間分店，呢間係弘大既Yeonnam分店似由兩層民房改建，一樓大部份樓面係廚房加擺放甜品既地方。二樓加室外都係用餐地方，不過一直落住雨所以室外一片吉檯。
今日天氣唔好應該少左客人，好多甜品都唔使等可以即買即試。
客人少左好多好hit既甜品都重有貨，都有兩三款sold out但轉頭再睇已refill。
飲品都可以，咖啡出品有水準。
呢度鬆餅選擇雖多，但好多款都真係好食，甜度適中外亦非常鬆軟。
追加既Lemon Juciy Home Party Cake帶微酸又有清新檸檬香氣。
吃罷甜品團友中兩位甜食家都讚甜品有水準。

食飽左甜胃先番民宿一轉，再出發去風川鰻魚延南洞店食炭燒鰻魚。
活鰻魚已在門外魚缸等待大家。幸好係食飯時間前到店，因為才5點左右已滿座，好彩等5分鐘已可入座。
店內都是炭火味，轉眼店家已送上燒至火紅既煤炭。配菜都已上檯。
放好炭後二話不說當然要燒鰻魚。
店員會幫手燒，鰻魚肉十分厚身，皮也有點厚度。
鰻魚肉唔太多軟骨，魚皮入口彈牙，魚肉先食到焦香味，再食到嫩滑魚肉及豐富魚油香。
鰻魚肉跟上配菜都掩蓋不住其油香。其實口感同油香方面都吃得滿意，下次來首爾也可考慮再來。

今日已吃既三餐其實係一餐接一餐，所以晚餐時間真係食唔落野，等到九點左右先叫外賣。
左睇右睇都係叫番韓式炸雞同豬手外賣，再加一份沙律平衡下油膩感。
炸雞決定叫穩膽既橋村炸雞，食落的確係皮脆肉嫩。
除左炸雞另外叫左豬腳小姐，肉味幾濃而皮下脂肪都唔算好多。
不過食食下都覺得滯滯地，所以都叫多個沙律消下滯。
今日太早起身坐早機由濟州到首爾，加上首爾落足一日雨，走出走入市區同民宿令大家更疲累，食過外賣就放棄外出早點休息。

花蟹堂
15 Gukhoe-daero 62-gil, Yeongdeungpo-gu, Seoul
82 2785 4422

Cafe Layered 카페 레이어드
223-20 Yeonnam-dong, Mapo-gu, Seoul

風川鰻魚延南洞店
39 Donggyo-ro 27-gil, Mapo-gu, Seoul
82 2 332 8361

橋村炸雞 弘大店
6 Yanghwa-ro 16-gil, Mapo-gu, Seoul
82 2338 1300

豬腳小姐
123-1 Eoulmadang-ro, Mapo-gu, Seoul
82 2 337 2111

韓國濟州島首爾自駕自由行 Day1

韓國濟州島首爾自駕自由行 Day2

韓國濟州島首爾自駕自由行 Day3