馬友一夜情 : 美美小廚

 
以前在港島生活，好多港島好餐廳就算未食都知佢既存在。呢十年因工作生活搬去九龍，自然會冷落左一堆港島既新餐廳。
半年前港島南番工既食友同家住鴨脷洲既朋友，都不約而同提起美美小廚，但上年比較忙而店家星期日例休，所以拖到年尾同今年年頭先有時間去食下。
小廚係茶記格局，有正常茶記同車仔麵出品外，亦有泡飯選擇，另外手寫黑板會每日更新今日有咩鮮魚套餐如青根等，出面最常見又最平既鯇魚黃立鯧等等唔會出現。
兩碗例湯落完單就出現，冇味精又夠味。

鮮魚套餐既蒸牙帶魚先到。

魚餐既蒸牙帶魚跟上白飯，魚身肉質結實，亦食得出牙帶魚既鮮味。
凍檸茶正常，飲落冇苦澀味。
見到自家製鹹鮮一夜情馬友已知食硬佢，即叫即煎所以比較遲上檯。
馬友煎得幾金黃食落香脆。魚肉入口鮮嫩，一夜乾令魚味更濃郁，最嫩既魚肚位更食到啖啖魚油。
最後唔只魚肉完全KO，因魚頭魚骨都有油香，所以粉碎左魚頭同成條魚骨。另叫蠔仔竹笙泡飯轉米粉。
蠔仔新鮮所以煮出黎既湯汁都有蠔鮮，米粉竹笙也吸湯所以成碗都係蠔鮮掛帥。

今日想試多點出品，就叫多碗牛筋腩加鳳尾蝦卷米線。
鳳尾蝦卷口感實在但調味甜一點，牛腩偏瘦入口有點硬，不過牛筋夠軟淋可以加番分數。
今次來到要等位10分鐘因人流比上次更多，睇怕下次要早餐時間先唔使等位。

美美小廚
地址：鴨脷洲鴨脷洲大街108號
TEL : 5400 9289