2024年台北快閃自由行 第一日 (Just Inn正旅館 二屋牡蠣拉麵 COOKIE886 灑白甜 詹記麻辣火鍋 臨江街觀光夜市 紅花麻辣鹽水雞 臺北郵局 焦糖楓串燒西門店 阿財虱目魚肚)

 
安排今次旅程只因miles到期，結果就決定快閃台北三日食下行下就好。三日旅程就買三日捷運pass加來回機場車票。
9點鐘機由起飛delay去到台北已過11點，出到市區台北車站先去Just Inn正旅館。
去到旅館放低行李，出發行去食台北第一餐。

二屋牡蠣拉麵算係步行範圍內，去到門口已有人在等位。
等到就有位可以係門前坐低等入座，店家亦會叫客人先買票落單。
叫左鹽味同醬油濃厚牡蠣拉麵各一，另加一碗叉燒飯就好。
麵同湯都可以追加十分貼心。
叉燒飯唔算大碗，飯面部份叉燒經過炙燒幾香口。
叉燒配埋飽滿飯粒同食係不錯既享受。
主角濃厚牡蠣拉麵上檯。
麵身有咬勁亦都掛到湯，不過兩款湯底比較下覺得醬油湯既牡蠣味比鹽味更濃。
三隻飽滿牡蠣都做到野，有著不錯既鮮蠔香。
叉燒肥瘦相間入口軟熟。
配菜中最突出係十分香甜既燒洋蔥片。

食完拉麵見到不遠處有條小人龍，原來係排隊買COOKIE886既出品。
睇資料呢度原來係2023全台烘焙大賞TOP30名店之一。見有時間就買盒原茶綜合當手信。

食過正餐就去同一條街既灑白甜。
買下鮮奶麻糬當甜品。
一片片既奶香麻糬入口煙韌非常，瘋狂沾上店家既花生碎加芝麻糖粉既沾醬粉都唔會太甜。

食飽係時候番去Just Inn正旅館check-in。
房間偏細，唔係太多地方掛衫或放行李。
好在廁所乾淨同花灑夠力出水都夠熱。

下午四點要轉戰訂左檯既詹記麻辣火鍋敦南店。
門口有攪怪poster同影相機消磨時間。
招待處隔離電梯門係入口，由電梯另一邊門一出就係大廳。
其實行過少少右邊都有通道入大廳，唔使係部電梯都出出入入咁攪笑。
幾年冇食過詹記，幾飽都想再食佢地既麻辣湯加鴨血豆腐。
未到晚餐時間所以係飽住食，叫半份翼板牛加半份松阪豬就好。
點知做會員有特價梅花豬一整份。
白菊烏梅湯好飲，白菊茶香同烏梅酸甜都平衡得唔錯。
太多肉要點個茼蒿食下，個樣同香港既唔似但食落一樣味道。
翼板牛同梅花豬比較瘦，松阪豬多一點油香。
最期待既麻辣湯同鴨血冇走樣。
鴨血軟嫩入口即滑入喉嚨，吸收左麻辣湯既豆腐都好食，不過鴨血太好所以比下去。

食到好飽要散下步，就行去臨江街觀光夜市落格。
點知行到街尾見到紅花麻辣鹽水雞。
都係忍唔住買左鹽水雞脾加3個配菜。
睇落門口冇乜客人原來已經好多單等緊，俾左錢拎左籌都要等15分鐘先有，最後行番酒店先慢慢嘆。
雞脾肉幾乎無脂肪偏瘦但有雞味，配菜都爽脆，不過小辣食落都幾辣。

休息到9點左右再出動。
經過已列為市定古蹟既臺北郵局同西門町就順便打下咭。
宵夜第一站先去焦糖楓串燒西門店試下串燒。
一入門就見到所有串燒。
隨心揀幾款菜類，再加幾串牛豬羊肉同雞翼試下。
揀好串燒坐低等食。
等十幾分鐘就有得食，串燒都帶點焦糖香甜。
個人覺得最好食係烤麻糬及筊白筍，前者煙韌後者爽脆。

食完串燒本來想搵酸辣湯，點知去到小店見到今日冇開，轉頭去左阿財虱目魚肚食粥同煎虱目魚。呢度既野都係即點即炒即煮，所以要等下先有得食。
煎蔥蛋唔會太燶，蛋身厚實有蛋汁。
魚肚粥內魚肚鮮嫩，粥底帶魚鮮，就算唔落胡椒粉都唔會有魚腥。
金黃色既煎魚肚睇落吸引，食落魚肉亦真的煎得香脆及有魚油香，雖然唔平都值得一試。

Just Inn 正．旅館
台北市中正區重慶南路一段1號3樓
02 2371 8230

二屋牡蠣拉麵
台北市大同區赤峰街35巷11號

COOKIE886
台北市中山區民生西路66巷25弄1號
02 25317886

灑白甜鮮奶麻糬
台北市大同區南京西路25巷38號
02 2559 1011

詹記麻辣火鍋(敦南店)
台北市大安區和平東路三段60號
02 2377 7799

臨江街觀光夜市 (通化街夜市)
大安區臨江街
02 25505220

紅花麻辣鹽水雞-通化創始總店大安區臨江街103號
02 2706 6838

臺北郵局
忠孝西路1段118號
02 2720 8889

焦糖楓串燒西門店
萬華區成都路46號
0975 852 693

阿財虱目魚肚
萬華區內江街53號
886 2 2370 3378

2024年台北快閃自由行 第一日