慶生party飯局 : 金碧酒家

 
每年二月頭臨近食友生日，有時間的話大家都會食飯見下面順便慶祝，今年食友既相熟好友係金碧訂左幾張大檯攪局，食友借左張檯同成班酒友食友來個慶生飯局，在此謝過食友及食友好友既安排。
金碧熟客多，一早已知晚晚都好熱鬧，今晚都冇走雞，由入門到離開一刻都好似開party咁高興。
今晚都預左有唔少紅白烈酒出現，誰知開席前同開席後酒枝有增無減，今晚想唔盡興都難。
湯汁既杏汁豬肺湯先到。
湯汁色水一睇已知夠火喉而且十分足料。
蠔豉鬆生菜包十分惹味。
蠔豉粒炒過食味濃郁，配上清爽既生菜包一濃一清同食又岩岩好。

錦鹵雲吞跟秘制八珍錦滷雲吞汁上檯。
雲吞皮雖厚卻炸得香脆，沾上食材豐富既開胃酸甜醬汁，令人食慾大增。
酥炸蟹鉗十分引人，個個蟹鉗都炸得金黃而個子又豐滿，用筷子都唔夠快所以大家直接用手拎住食。
咬落去外層脆而不乾，食落入面蟹肉多到癲又彈牙，每次到訪呢味都係必食之一。

順德鯇魚腸蒸蛋未必人人岩食，因唔少人會怕魚腸既苦澀。
但呢度既出品完全冇澀味之外，蒸蛋在腸油加持下更是嫩滑。
手工菜又點少得順德釀鯪魚。將鯪魚肉切出絞碎，調味及加入其他食材如臘腸粒，再釀番入鯪魚殼成條煎香先完成。
入口魚皮香脆又會感到彈牙鯪魚肉在口中跳動。秘制蜜汁燒鱔球都係好野，鱔球外層做得香酥外，蜜汁調得剛好，既有蜜香又唔會蓋過燒鱔既油香。
食到紅燒元蹄已覺得飽，但元蹄既反曬光厚身紅燒元蹄皮真係好正，令自己幾飽都忍唔住食埋一份。
茄汁大蝦中既蝦球隻隻都有手掌咁大咁長。
最後既炒菜同牛河比起之前既菜式好似無甚特別，不過食起來都有鑊氣。
近日睇到網頁話今年到2025年1月都已訂滿，希望在彩虹邨完成歷史任務之前，可以同食友食多一兩次吧。

金碧酒家
地址：九龍彩虹邨金碧樓22號地下
TEL : 2320 0937