想起炸兩 : 發記粥麵

 
一間疫情前已間唔中幫襯既粥舖，當走入大埔又冇咩胃口既日子，通常上大埔街市熟食中心既發記食碗粥。
疫情過後街市既熟食檔大部份都健在，今日又上黎食碗粥加個炸兩。

呢度同出面粥舖差唔多，粥品都係大路出品同生滾粥。
今日叫番食開既艇仔粥加炸兩。
粥底綿密食落有米香，今時今日出面唔少粥舖既粥底一係水汪汪，一係就淡而無味。聽聞店家用澳洲米而非大陸或越南米煮粥，自己真係食唔出邊度出品，只覺得出品對得住價錢。
粥入面食材比出面既多又新鮮，魷魚碎牛同香脆花生食極都有。
重有好少會係艇仔粥出現既切條魚蛋。
呢度另一賣點係炸兩。
腸粉薄而不爛，中間既油炸鬼由上檯一刻開始，食到到最後一舊都係脆既。每次想食炸兩既時候，都會諗起呢度既出品。

發記粥麵大埔鄉事會街8號大埔墟街市及熟食中心2樓CFS18號舖
TEL : 2638 8079