[世界盃系列] 最後一輪分組賽前瞻 (A 至 D 組)
世界盃 A 至 D 組兩輪分組賽過後，16 支球隊只有法國兩戰全勝提早鎖定出線資格，其他都要鬥到最後一輪先知道鹿死誰手。筆者就趁最後一輪分組賽開始前同大家分析一下各組嘅出線形勢。
A 組
最後一輪賽事 (香港時間 11 月 29 號晚上 11:00)
荷蘭 vs 卡塔爾
厄瓜多爾 vs 塞內加爾
暫列榜首嘅荷蘭最後一場面對東道主卡塔爾只要保持不敗就肯定可以出線，而且卡塔爾兩戰過後實力明顯不及同組其他對手，發揮平穩嘅荷蘭要贏波首名出線嘅難度應該唔大。同組另一場比賽係厄瓜多爾對塞內加爾，後者今場許勝不許敗，只有贏波全取 3 分先能夠掌握出線主動權，但面對踢法同樣體力化嘅厄瓜多爾，相信會係一場勢均力敵嘅比賽。
B 組
最後一輪賽事 (香港時間 11 月 30 號凌晨 3:00)
威爾斯 vs 英格蘭
伊朗 vs 美國
呢組 4 支球隊數字上都有出線希望，而出線機會最大嘅要數英格蘭。暫時以 4 分排喺榜首嘅英格蘭最後一輪面對只得 1 分嘅威爾斯，威爾斯上場賠了夫人又折兵，兩球不敵伊朗之餘正選門將軒尼斯 (Wayne Hennessy) 更喺比賽末段領紅，今場需要停賽；加上綜觀上兩場比賽表現，球隊攻力疲弱、欠缺創造力，估計難以喺英格蘭身上攞分。另一邊廂有伊朗火併美國，後者必須贏波先可以出線，但面對伊朗機動性、高效率嘅反擊踢法難言佔優，筆者反而睇好黑馬伊朗可以喺世界盃走得更遠。
C 組
最後一輪賽事 (香港時間 12 月 1 號凌晨 3:00)
波蘭 vs 阿根廷
沙特阿拉伯 vs 墨西哥
同 B 組一樣，C 組嘅 4 隊球隊都仍然有出線機會。備受關注嘅阿根廷首輪意外不敵沙特阿拉伯，慶幸上場及時回勇擊敗墨西哥保持出線希望，今場面對連續兩場都能夠保持清白之身嘅波蘭預計會係一場攻防戰，但波蘭嘅防守反擊亦絕對不能小覷。同組另一場賽事由沙特阿拉伯對陣墨西哥，兩支球隊同樣慣用先聲奪人嘅踢法，一開波就會不斷作出中前場逼搶尋找機會，相信雙方會不停喺中場短兵相接，係一場節奏明快、有來有往嘅比賽。
D 組
最後一輪賽事 (香港時間 11 月 30 號晚上 11:00)
澳洲 vs 丹麥
突尼西亞 vs 法國
法國喺 D 組一枝獨秀，兩戰全勝以 6 分位列榜首兼提早獲得出線資格，最後一場只要保持不敗就可以肯定首名出線，估計領隊迪甘斯會作出一定程度上嘅輪換，俾一眾主力休息之餘亦避免佢哋受傷，但後備深度充足嘅法國面對突尼西亞要保持不敗並非難事。上屆成功打入 16 強嘅丹麥至今仍未打開勝利之門令人意外，今場對住同樣要爭取出線澳洲必然係一場惡戰。值得一提嘅係兩隊上屆同樣身處同一個小組，當時雙方以 1:1 握手言和。
圖片來源
FIFA (https://www.fifa.com/fifaplus/en/articles/qatar-2022-all-qualified-teams-groups-dates-match-schedule-tickets-more)
Livescore (https://www.livescore.com/en/)
大家嘅支持就係對我嘅鼓勵，如果大家想支持下我或者一齊講下波嘅，歡迎 like 我嘅 Facebook Page 同 follow 我嘅 Instagram！(*本人並無於 line today 開設專欄)
https://www.facebook.com/blacksontalkball/
https://www.instagram.com/blacksontalkball/