《深入淺出》魯迪加會取替何人成為正選

顯示分享連結
-請支持藍獅 Facebook專頁-
《原創文章 歡迎轉載 請列明出處 謝謝》

至今轉會窗都開左大半個月，車路士放走既球員多不勝數，而在收購上暫時只有三名新球員進帳，主要建基於中後場既人腳補充，今集將會講其中一個重點收購，就係由羅馬轉投黎藍橋既德國國腳魯迪加，黎緊究竟邊個既位置會比佢取替，本文為大家細心分析。
．圖片來源 : Mirror

其實唔計左右翼衛的話，單睇後衛黎講干地已經算係組軍完成，上季擔任三中堅既大衛雷斯、卡希爾同艾斯派古達繼續留任，而隊長泰利不獲續約離開，新星方面有基斯甸臣回歸，連同季中回收番黎既艾基同傷癒復出既蘇馬，考慮到黎緊將會出戰歐聯，最終干地選擇留任有歐戰經驗既基斯甸臣，收到般尼茅夫既報價後將放行艾基，以及將狀態不佳既蘇馬外借到史篤城，再補充同樣有大賽經驗豐富既魯迪加作為新血。雖然為艾基既離開感到可惜，當中未有任何回購條款亦令人憤慨，但放走佢而加錢換入德國人此舉同時值得大家理解。
（註：蘇馬外借到史篤城尚未獲得官方正式宣佈）
．圖片來源 : Sportskeeda.com

在於干地既首選邦路斯不想離開意大利發展，而雲迪克亦遭修咸頓索價過高，同屬羅馬既文路拉斯亦只係空穴來風，市場上既用波型中堅（ball-playing centre backs）買少見少，以合計達3,800萬歐元，約相當於3,350萬鎊既轉會費收購得到魯迪加，可以話係一單相當得宜既交易。

先了解一下球員既特質，魯迪加係一名相當具速度同韌力既後衛，除左中堅之外，亦能夠勝任左右兩閘，穿上前副隊長伊雲奴域既2號波衫，令人聯上得到佢會成為新既後場通天老倌，而德國人既助攻力亦不容忽視，魯迪加擁有帶球前插既能力，同時長傳視野亦唔比大衛雷斯差，都能夠將皮球快速傳送到前線。話雖如此，哩位德國洲際國家盃冠軍成亦偶有失位情況出現，暫時都未能成為三中堅入面核心負責指揮既一位，好多時都要其他隊友幫手補位，另外佢都有唔少傷患病歷，而且每次一傷都要休息一段唔短既時間。
．圖片來源 : Sky Sports

再睇番位置上，唔少球迷都認為魯迪加係會替補艾斯派古達既位置成為右中堅，將西班牙人放回邊路與摩西斯作右翼衛輪換之選。但由於大衛雷斯與卡希爾又大一年，速度上兩者只會愈來愈慢，如果繼續同場合作只會讓對手持續作出速度上既爆破攻勢。所以下季大有機會係五人之間互有輪換，而中間位置繼續以雷斯為核心，或會選用同樣有用波能力既魯迪加作位置上既訓練，而卡希爾、艾斯派古達及基斯甸臣就會各自在左右後衛位置上陣，相信哩個安排較為恰當。當然，一切都仲要睇干地喺季前熱身賽既戰術排陣。
．圖片來源 : Sky Sports

與此同時，希望球會唔好唔記得自己來季仲要出戰歐聯，積極收購番啲合適人選去替代番離開左既球員，否則難保連聯賽前四位置都將會失去。

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章，請即分享到︰

標籤: 魯迪加  車路士  干地