《新車介紹》巴卡約高能否為車路士中場帶黎新衝擊

顯示分享連結
-請支持藍獅 Facebook專頁-
《原創文章 歡迎轉載 請列明出處 謝謝》

正當今年三月時份賽季還未結束之時，經已有消息傳出車路士將會羅致摩納哥中場巴卡約高，直到上個月球員正式成為今夏藍軍第三個收購，來季將會穿上藍色波衫在史丹福橋作賽，今集將會重點講出究竟巴卡約高會為車路士帶黎啲咩新衝擊，而哩份法國新星拍住同鄉簡迪究竟會有咩火花出到黎？本文將會為大家細心分析。
．圖片來源 : Chelsea FC

貴為上季法甲盟主既要員之一，成為今夏被拆骨離開既一員，而干地需要佢既原因，主要係留意到車路士上季既問題，喺用開既343陣式當中，兩位中場人手配置主要係以簡迪做鐵膽，利用無限既體力不斷在球場上迫搶，而另一位拍擋就因應對手而定，如果係強強對碰主守同以穩行先的話就會派出馬迪，另一邊箱如果對手只屬中下游水平打主攻就會用上法比加斯，而正選次數前者佔為較多。但係有睇開近幾季車路士既球迷都知道，馬迪本身並非打開哩家波，明顯職責同位置都比簡迪既加盟而搶走，上半季一段順境波既時候問題不大，但去到下半季球隊整體踢得唔係咁如意既時候，同時馬迪狀態不穩引伸出黎既問題就被無限放大。
．圖片來源 : The Sun

喺343陣式當中，馬迪除左本身既防務之外，要負責成為後場與翼衛及前場之間既連接，如果對手針對性地封鎖左右翼衛的話，佢更要引球推進到中前場或禁區位置，但由於佢本身盤球帶波都唔屬於特別上盛，而且速度亦唔高，所以每當一比人搶去腳下皮球就會追唔到，接近中門大門咁比人打反擊，當然陣式上有缺憾既地方，但狀態一稍為回落犯錯既機會自然多，下半季馬迪更加多場上隱形既情況出現，所以佢既離開即使轉投到死敵曼聯，大部份車路士球迷都選擇「要錢唔要人」。
．圖片來源 : Ligue 1

取而代之干地選擇既巴卡約高，必定係車路士未來核心人物之一，年輕絕對係佢擁有優勢既地方，現年廿二歲既巴卡約高絕對係上季摩納哥奪得法甲冠軍既重要功臣，具備優良既身體質素同體力，並非硬橋硬馬堵截對方攻勢，而係透過較靈活既機動性埋身去搶番控球權，什至作為轉守為攻既第一點，而且球員腳下功夫不俗，一啲小技術盤球過人或者傳球都駕輕就熟，場上覆蓋面亦不比簡迪低。

反而要留意既係巴卡約高比較鐘意上腳，在於343陣式當中如果取代馬迪作為輸送鏈運送皮球上前場的話，能夠做到絕對係好事，但如果每次上腳後都係單打獨鬥自己硬闖禁區什至推死位少做配合，對球隊整體黎講就絕非好事。與此同時哩位法國新星既傷患亦係要注意既地方，上季效力摩納哥時已經有紮住踢既情況出現，而喺季尾完成賽季後為膝部做既手術更令佢加盟藍軍既時間一拖再拖，幸好最終亦能成功通過體測。
．圖片來源 : Sport24 - Le Figaro

巴卡約高一入，馬迪一出，不少球迷認為以相近既價錢去完成哩兩單交易十分化算，小弟在此未有太多意見表達，不過配搭上簡迪的話，相信來季車路士在兩位法國中場既領導下，中圈既防守力什至韌度都十分充足，反而擔心既係創造力問題，巴卡約高亦並非善於一針見血製造埋門機會比隊友既球員，繼續配用343陣式的話有機會同上季一樣，在缺少左法比加斯上陣時中場會缺乏創造性，尤其面對著主守或以密集式進行防守既對手亦同樣難以破解，當然唔同既球員喺唔同既領隊手下都會得出唔同既效果，巴卡約高喺中場上既定位以至職責都留待復出後干地既安排。
．圖片來源 : post img

除左係上季既法甲冠軍成員之外，同時貴為上季歐聯官方最佳陣容中場之一，說實話小弟同其它球迷一樣都急不及待睇佢為車路士上陣既第一場比賽，究竟會配搭上簡迪作中場掃蕩，或是配上法比加斯一攻一守，又還是轉陣打三中場，也許黎緊星期日對陣阿仙奴既社區盾賽事將會揭曉。

另一位新車手 魯迪加既介紹 : 《深入淺出》魯迪加會取替何人成為正選

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章，請即分享到︰

標籤: 巴卡約高  車路士  簡迪  干地