【賽後分析】車路士大勝後的六大現象

顯示分享連結
-請支持藍獅 Facebook專頁-
《原創文章 歡迎轉載 請列明出處 謝謝》

車路士再一次以大比數擊倒對手，相信無人喺賽前能夠預計得到藍軍能夠面對史篤城可以全身而退，亦好大程度關係得到借將蘇馬不能上陣，引致實力上必定受到影響。除此之外，哩一場大勝亦反映左唔少現象同問題，一齊分析一下。

1 - 莫拉達上力 適應力何其快
迪亞高哥斯達正式離隊，意味著藍軍正選之位經已落入莫拉達身上，背著8000萬歐元轉會費黎到史丹福橋並無為佢構成壓力，適應同了解干地既戰術理念什至追過了巴舒亞伊，六場聯賽獲得六個入球已經証明自己能夠立足英超，同時間喺場上既走位、突破越位能力以及埋門觸角了得，都一一打破「9號魔咒」既宿命，莫拉達將會擔起車路士攻擊線既未來。
．圖片來源 : Read Chelsea

2 - 巴舒亞伊 新山寨王
在英聯盃對陣諾定咸森林賽事上射入三球戴帽，估唔到話咁快比莫拉達在聯賽中同樣射入三球追去焦點，如果要巴舒亞伊搶回首席射手之位，相信短時間內唔會有可能，近哩三次聯賽干地都未有派比利時人上陣，相信佢只能夠專心一意為球隊在本土盃賽中亮相。巴舒亞伊同莫拉達並非同類型前鋒，343陣式發揮佢既能力有限，如果咁的話其實干地有冇諗過轉一轉個陣式或者戰術去比佢有更好既表現？
．圖片來源 : 20 Minutes

3 - 韋利安 一直在模仿夏薩特
夏薩特接近全面復出，驅使韋利安繼續需要表現自己而爭取未來正選之位，心急反而令佢弄巧反拙，應交既波唔交，多番令球隊弄失控球權，就連一啲前線壓迫都做得唔好，似乎韋利安已經以為自己係夏薩特可以唔負責防務。如果繼續保持應追唔追的話，其實就連佢覆蓋面廣同全場跑動哩兩點都無埋，基本上要搵一個更技術型既球員取替韋利安得出既效果或會更好。
．圖片來源 : Premier League

4 - 受到簡迪及巴卡約高既保護 法比加斯發揮更加亮眼
干地喺下半場中段換入法比加斯，與簡迪及巴卡約高合組成為三中場，明顯地後兩者負責保護西班牙人，透過埋身迫搶、攔劫得到控球權後都會交波比佢，減輕左處理防務既法比加斯更能夠專心交出助攻或長傳，但要留意既係由於真禾特尚未傷癒，基本上以上三位人選經已係藍軍所有具實力質素既中場球員，干地既三中場陣式已經是「ALL IN」了。
．圖片來源 : Bongdaplus.vn

5 - 馬高斯阿朗素的不智
其實唔單止係哩場，開季至今已經有留意到擔任左翼衛既馬高斯阿朗素既動作，好多時攔截後都愛與球証爭論，同樣今場亦有相同情況，領得一面黃牌，及後不久亦作出一次高風險攔截，可幸球証並未有再向佢判罰多一面黃牌，否則未必能以十一人完成賽事，干地亦馬上換入卡希爾取替前者。其實開季至今聯賽六場比賽，馬高斯阿朗素經已取得三面黃牌，比起上季完成三十一場聯賽賽事取得兩面黃牌多得過份。
．圖片來源 : Football.London

6 - 卡希爾是掛名隊長？基斯甸臣、魯迪加已一步步確立正選
干地喺對手換入「長人」高治後馬上安排卡希爾上陣，絕對明白意大利人用意，而卡希爾入替後史篤城既猛列攻勢驅使藍軍後防經歷一輪動盪，及後換入法比加斯及夏薩特以攻代守，至令到後防壓力後以舒緩，同時相信卡希爾既上場時間將會進一步縮減。

在大衛雷斯停賽期間，干地依舊選用基斯甸臣為中堅中替代人選，此子雖然未有雷斯既長傳能力，但勝在穩定行先，禁區內既波應清則清，以簡單為主不做多餘動作；而長傳就交由另一拍檔魯迪加身上，哩位德國國腳早幾場一直都有交出到前場既長傳，雖然準繩度未有雷斯咁準，但至少見到巴西人不在場上都亦有球員能夠取替，戰術板斧未需過於改動。
．圖片來源 : Bleacher Report

黎緊車路士將會到西班牙作客馬德里體育會，干地輪換得宜，相信會為藍軍安排最合適陣容應戰，希望能夠在萬達大都會球場全身而退。

文章最後更新時間 : 26/09/2017 10:40

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章，請即分享到︰

標籤: 車路士  干地  史篤城