《飛吧！堅尼地 做你喜愛的翼鋒吧！》

顯示分享連結
《原創文章 歡迎轉載 請列明出處 謝謝》
-請支持藍獅 Facebook專頁-

．圖片來源 : W3LiveNews.com

干地黯然下課，繼而沙利接任，經已有現役球員仍未參與季前熱身賽而借走，似乎當時「辱華」風波對於佢喺藍軍既前途都已經亮起紅燈，今集主角就係剛剛再一次被外借到紐卡素既堅尼地 。

2015年，時任主帥摩連奴將堅尼地喺巴甲富明尼斯帶到黎倫敦，哩位巴西小將正式展開佢既英超生涯，該季一共為車路士在各項賽事上陣達20場，其中出任過既位置包括左閘、左中場、右中場同右翼鋒，可以話保持到一定既上陣時間，但可惜當季藍軍整體表現欠佳，球隊表現不穩，引致摩連奴季中下課，而堅尼地相比於同鄉拉美利斯能夠喺「救火領隊」希丁克手底下獲得唔少上陣機會，已經相當唔話得。

直到前季干地接任帥印後，堅尼地似乎唔係意大利人計劃既一部份，開季無耐就將佢借到屈福特，但不幸既係巴西人好快就受到嚴重傷患困擾，被屈福特中止借用並返回車路士休養，一傷就傷左接近大半季，即使一月尾復出亦喺收咧前只獲2次上陣機會，哩一次大傷無疑對佢喺史丹福橋既前程有著深遠影響。

到上季賽前熱身賽時堅尼地牽涉「辱華」風波，一直被球隊雪藏到12月，即使解凍後巴西人亦只能為藍軍喺一啲本土盃賽上上陣，而擔任既位置正正係馬高斯阿朗素既左翼衛位置，但堅尼地場上風格攻強守弱，加上位置感奇差，防守質素低劣，根本就唔係左翼衛既材料，完全諗唔明干地點解會放佢喺哩個位，而唔係比佢做左翼鋒，更喺下半季被球會租借至紐卡素。

再一次被外借，但今次有啲唔同，曾經教過車路士既賓尼迪斯似乎已經擁有活用堅尼地既說明書，話比大家知究竟點先能夠用得好哩位巴西翼鋒，自加盟紐卡素後喺英超全部賽事正選上陣，返回翼鋒位置堅尼地就好似如魚得水一樣，持球突破過人、關鍵傳送以至推大位射門應有盡有，喺喜鵲短短哩6場間就貢獻出2入球1助攻，為紐卡素喺邊路上提供活力同一定既侵略性喺度。

上季紐卡素能夠護級成功，堅尼地可以話功不可沒，而賓尼迪斯亦「食過返尋味」希望再一次將佢收歸旗下，雖然今次都係外借，但合約中包括了買斷條款，深信紐卡素在賽季結束後亦會激活此條款將正式將堅尼地成為喜鵲一員。

飛吧！堅尼地，別望回頭，也許你在賓尼迪斯手下至會得到真正成長。

文章最後更新時間 : 19/07/2018 16:15


《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章，請即分享到︰

標籤: 車路士  干地  沙利  堅尼地  紐卡素  賓尼迪斯