《狀態成疑 人腳未定 ︱車路士開季前瞻》

顯示分享連結
《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-


話咁快就開季，老實講感覺就好似只係完左季無耐，經歷左歐國盃、美洲盃連同奧運等一連串國際級賽事，實在有啲令人吃不消。

回歸正題，車路士早前經過完美國之旅後返回倫敦，同國際米蘭喺史丹福橋完成埋最後一場熱身賽正式迎接新一季，回顧番哩幾場友賽，直到對國米時都幾明顯見到球員狀態未去到十足水平，未理解到係訓練問題還是球員舟車勞頓所引致，而個人傾向前半部份居多，但如果以哩個狀態開季的話，情況難免令人憂心。


加上新主帥上場，基本上由場內到場外所有野都要重新適應，唯一不變既就係轉會操作依然成為大眾焦點，現時球隊陣容過於龐大，相信直到轉會窗結束前仍有唔少球員會離開，喺哩個未知數影響下再遇上戰術適應期，磨合定必需要更長時間，預期新球季亦會同上季初一樣出現大上大落既場面，至於哩段時間要延伸幾耐就睇馬利斯卡既功力，而個人就唔敢睇好。

前中後三線既詳細問題可以參閱番早前陣容探討既三篇文章（留言區有連結），黎到依加開季以及轉會窗接近尾聲，老實講暫時只有柏度尼圖哩單交易叫做有針對前線問題而作出補充，其他位置包括後場中堅依然有量無質，熱身賽亦見唔到戰術上有為後防做好保護，反而仲多左唔少輕易打穿高位防線既畫面出現。


中場分工仍然有待觀察，賀爾既加盟如何融入到安素及卡些度之中將會係另一個課題，至於前線就仍未理解得到球會究竟係想搵一名純射手還是繼尼圖後再搵多個多面手返黎，感覺上好似想做靚盤數多於以實際需要作目的，傳聞中兩名潛在目標包括拿玻里既奧士文以及馬體會既祖奧菲歷斯經已係兩種截然不同既風格，單計所打既位置都已經唔一樣。

總結以上內容，喺太多不確定因素下已預視新球季將會出現一輪動盪，球員狀態仍未十足，加上需要時間理解戰術同磨合，與此同時新帥馬利斯卡亦一樣要時間實踐自己既中心理念，而球會有幾多轉會操作係同主帥商議過後至作出決定就真係不得而知，按觀察自保利及其集團入主後所做既交易都偏向投資未來為主，只要出得起價有錢賺就可以轉售球員圖利，所交出黎既暫時都只係賬面上既成績，而並非喺球隊排名上反映出黎。

相信今季亦會繼續係跌跌撞撞既一季。


文章發表時間 : 17/8/2024 11:30
文章發表時間 : 17/8/2024 11:30

《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章，請即分享到︰

標籤: 車路士