香港地打工，最希望打風

如果要數香港人最大既共同願望，肯定唔係我要真普選，唔係香港獨立，甚至唔係發達。
而係打風。
我諗香港人係地球上最渴望打風既民族。
我未聽過其他國家知道有機會打風，會好似香港人咁開心。
一夜既洗版當然唔少得、念力祈禱個風唔好走咁快既人都唔少、走到海旁感受風力既癲佬亦有。

貴為全球工時最長既我地，一個星期平均做成50個小時，每日起身就係番工，放工就係訓教。可以話個個星期都係咁，機械人都無我地咁「勤力」。無論你係邊，問邊一個香港人，佢都會毫不猶疑咁答你：「我好忙。」
搞到自己好忙，基本上係香港人既核心價值。

係呢咁變態既生活方式既下，意外既（或許該說計劃之外）的假期，對香港人黎講就變得特別彌足珍貴。
唔單純因為唔洗做，而係無啦啦唔洗做。學黃子華話齋，有咩爽得過你明知聽日要番工，但係天文台掛緊三號。
呢種心態，就同師奶係街市買餸搭棵蔥，又或者去超市便利店買野送印花既心態一樣。覺得自己佔了便宜。
原本十蚊既菜，如果佢肯搭條蔥俾你，就算冇咩用，你都會覺得自己賺左。
打風假正正係同一道理，工我本身就要番，如果番番下，我唔洗自己請假，又唔會被老闆話，而我竟然唔洗番工喎！有咩爽得過咁？

近年打風放假機會愈來愈少。就算有幸掛八號，都係放工掛，開工收，好似同你接更咁。
難得今日掛八號，唔洗番，偷得浮生半日閒，大家就盡情放鬆一下啦！