特南克斯－未來世界的新神

終於完sem，今朝寫咗兩篇文之後，搵番無追好耐既龍珠超黎睇。唔知大家睇到邊，我岩岩睇完第66集。特南克斯發藍光斬死札馬斯個集。

係人都知藍光代表「超級撒亞人blue」，係有「神」氣息既撒亞人再變身成超級撒亞人既狀態，有人話特南克斯無跟破壞神修練過，又無變過「超級撒亞人之神」，變blue係鳥山明亂咁黎。

加咗「神」系統之後真係複雜到一個點，因為佢同超撒123係分開黎計......簡單D，如果用番超撒黎比喻，紅色頭髮就係神既超1，藍色頭髮就係神既超2。
咁到底特南克斯身上既藍光係點黎？呢一點，我想試下從「神」既角度入手。明顯唔係所有神都係撒亞人，咁如果所有神都要經過悟空個個階段，一定要搵五個撒亞人去成神明顯唔合理，亦都唔可能係破壞神佢地成神既方法。所以，我地可以假設成神既方法唔只一種。

咁當然唔能夠論證特南克斯隨便大喊幾聲就成神。所以第二點要注意既，係特南克斯成神既理由，又或者神之所以為神既理由。

神係受人信仰而出現。

人類由崇拜太陽，風，水等等既大自然力量，從而慢慢發展出信仰再到最原始既宗教。

番番去當時既故事背景，所有神都被札馬斯殺曬，而個個時空唯一既神札馬斯又係人類既敵人。於是剩番落黎既人類，處於一個無神可信既時期。而第66集正塑造小卷（小女孩）對特南克斯的崇仰。如果我地相信神係受人信仰而出現的話，咁係未來人類當時唯一信仰既，就係特南克斯。特南克斯所講感受到眾人既氣息，應該就係信仰。而特南克斯亦係同集講出，呢個係佢身為呢個時空（未來）既佢既責任。而唔係靠悟空或者比達去解決。

所以如果鳥山明真係表達緊一個未來世界既新的神的誕生，特南克斯身上既藍光就好合理。