【最佳損友】珍惜還有損友的日子

要你數身邊一個損友，你第一時間會諗起邊個？
係小氣鬼阿明？定遲到大王阿澄？
我哋身邊總有一個令你氣得牙癢癢的「損友」。佢唔係壞人，但係對朋友往往唔夠義氣，有時都幾乞人憎。

你有時都不禁反問自己：點解仲同呢啲咁嘅人做朋友？
佢再衰仔衰女都好啦，你都係無同佢絕交。有時你會嘗試說服自己，都同佢識咗咁多年啦！唉，都慣㗎啦！
係咪真係慣呢？睇怕唔係，因為佢下次再損你嘅時候，你一樣恨不得將佢生吞活剝。呢位就係平時同你最傾得最玩得，但係有時又會激到你生蝦咁跳嘅「損友」。

請珍惜還有損友的日子，因為原來隨住年紀愈大，人愈成熟。
慢慢地，朋友會變少。你亦懂得分開同事同朋友嘅分別。
慢慢地，你開始唔記得朋友係咩一回事。同你有親嘅，咪親屬囉！同你共事嘅，咪同事囉！至於朋友？
慢慢地，你唔再當任何一個出現係你生命中嘅過客為「朋友」。

自然而然，連朋友都減少，更加唔可能出現新朋友可以變成新一代「損友」。
因為任何有機會利用你，傷害你嘅人，你早就對佢有所防範。只要佢有少少異動，你都識得同自己講，預咗㗎啦！早知佢係咁，所以我都無當過佢係朋友。

所以請珍惜還有損友的日子。
因為當你發現自己身邊再無一個損友嘅時候，好可能你已經係不知不覺間遠離人群，唔再將朋友當成生活的必須品。
冇任何人能夠傷害你，只係因為你都唔再相信任何人。