認真你就輸？

你有冇聽過人地同你講：「認真你就輸啦！」
如果真係認真就輸，咁點先贏？唔通佢地會覺得鬥唔認真，鬥hea就叫贏？
當然唔係，佢地心裡面都知道，唔認真係唔會贏。
咁咩叫「認真你就輸」呢？就係大家都唔好諗點贏。無人贏，咁咪無人輸囉！大家都求求其其，柴娃娃過活最好。咁就無人需要面對問題。
因為你一正經同佢講野，佢就可以用呢招超必「認真你就輸」，結果無人認真，亦無人可以認真。

時下好興一套「認真你就輸」既價值觀，其實怕輸的人，往往會「特別的瀟灑」。呢種灑脫，只係唔敢認真既代名詞。佢地心底裡意識到，認真往往意味著責任，以及責任所伴隨的壓力與風險，以及成功，或失敗。唔敢贏，又唔想輸，所以唔認真。

呢個問題意外地反諷，只因我們一生中，大部份時候都不能夠好好地去認真看待一件事。
你認真嗎？正正因為唔認真都無咩所謂，認真才變得如此迷人可愛，認真才有意義。
　
呢種無相神功可以替佢地擋去一切風雨。人地贏咩？佢地會覺得自己未認真姐。自己輸咩？佢地會覺得自己未認真姐。但正正因為佢地從來都唔認真，結果卻是日子照過，一事未成。
　
認真的人愈來愈少，認真的價值就愈見可貴。
你認真嗎？