林日曦死好命！【又講毛記】

見到林日曦係篇文度提到自己成功係死好命，引發柳臣想借機講吓「好運」呢樣野。

唔係好運會成功，而係成功之後會深信自己主要係死好命既人會成功。呢個同謙虛話自己「好運姐」唔同。

話靠運唔係迷信，唔係唔洗努力，相反你知道得咗係靠運，其實係更加無唔努力既藉口，因為命係公平，完全by chance既野，理論上咪絕對既公平囉，公平你就冇得怨命。

所以知道自己死好命既人，永遠唔會怪運氣唔好。件事做到係運氣好，件事衰咗係自己做唔到。會咁諗野既人，先會「好運」。
好運只係結論而唔係原因。

而講到最後，到底咩叫好運？
「運」就咁講就好虛，但其實講到尾，現代社會好唔好運，件事成唔成，就睇有幾多好運既人肯埋你身，肯幫手。
如果你想做一件事，全世界好運既人都肯幫你，你唔會唔成功架！

咁好運既人點先會埋你身？
神奇既地方就係呢度：好運既人點先會埋黎？就係你都好運囉！
唔通好運既人會走埋個黑仔既人身邊衰埋一份咩？

明就明，唔明就唔明。
就好似大時代成套劇最後就係講運，依柳臣所見，大部份成功既人都明白「死好命」既重要性。

#唔係你好運所以你得　#而係你得所以你先好運