畢業生工作志願 | 去做 空姐 好嗎？ |

顯示分享連結
首先俾大家睇下我隻阿婆手，圖中是我的永久傷患:


因軟骨不正常增生而變形的無名指，噤落去會痛，唔戴得戒指。

自從做空姐以來，不停有人問我入嚟做好無，有剛畢業嘅、有想轉工嘅，但講啲嘢俾你哋知，不停不停都有同事同我講走啦好無呀，香港地，再好嘅工都有人彈，再差嘅工都有人做。做唔做，取決於你想喺份工到得到啲咩，呢份工留得住我五年，總有佢留得住我嘅地方。

01| 免費去旅行

美加澳歐日韓台星馬泰我通通去過，初頭好期待，但你同一地方去十次，唔會再有特別感覺，而且一諗倒杯麵陣味 + 要飛十幾個鐘先到… 你會想留係香港同屋企人睇電視。
不過，所謂去旅行好多時都係走馬看花，因為個 stay 通常唔長，比如澳洲機，24 個鐘留係當地，訓覺無咗一半，咁你都要休息、食嘢，剩低可以去玩嘅時間其實唔多。但係呢，對我嚟講有機會比我去台灣買下Mask、去韓國食下Bimbimbap 都夠開心嘅。

02| 一折機票

係好正架！上到機嘅話！搭過魚翅都知幾乎班班都 full，仲搞埋啲咩 fan 咩 fare，機票價錢直逼廉航。其實我哋只可以喺淡季去旅行，重要冒著白俾酒店錢嘅風險（上唔到機的話），試過同老公喺台北由朝早 10 點等到夜晚 9 點先上到機… 嚇死！第二日返唔到工就連份工都無埋。

03| 無固定同事

代表無辦公室政治，你唔鐘意佢就落機byebye，好行夾唔送，但亦都意味着你要有比較強嘅適應能力，要經常同唔同人合作，適應唔同國籍/年紀/性格/性別。

04| 彈性工作時間

代表你唔需要固定一至五、朝九晚五。可以唔使日日早起身。但你好多情況下需要半夜起身返工、通宵、第二日再倒屎起身返工，好彈性的，不過我肯定你個生理時鐘無咁彈性。遇著颱風季節delay 俾客小就梗，祝你好運。

05| 多假

每個月有五個quota調更，調倒你鍾意嘅地方、假期係你本事，調唔到工照返。不過你飛得少就人工少（時薪制度），你自己揀啦。仲有你大有可能要年初一返工大吉、生日係飛機渡過、情人節俾成機印度佬輪姦，輪whiskey water 姐，不過講真，調到靚更/多假可以做自己野又真係爽YY嘅！

06| 周身傷患

有一樣嘢好想講，做空姐最大嘅付出係身體健康。我敢講我的好同事個個身體都總有傷患，腰痛膊頭痛胃痛事小，腳趾公內彎、靜脈曲張、濕疹、髓間盤突出好可能係一世。因為長期作息飲食不定時、長期重複同一動作、同埋比一般人接觸更多輻射… 身體變差係遲早嘅事。

每份工都係，食得鹹魚抵得渴，你必須接受佢成個Package，我接受架，所以我仲喺度，希望大家都搵到份自己鍾意嘅工。

申利：我喺魚翅航空做，其他航空公司可能會有唔同。

_______________________________________

FB: 兼職空姐姥姥
IG: christyylolo
航空資訊、分享生活、隨心寫作。

Facebook▶https://www.facebook.com/parttimelolo/

UBlog▶http://blog.ulifestyle.com.hk/blogger/christylolo/

GoTrip▶http://www.gotrip.hk/author/christyylf/

Youtube▶https://www.youtube.com/user/christyylf/videos


如果喜歡我們的文章，請即分享到︰

標籤: 空姐  空服員