《異能仨》(Glass) (*含嚴重劇透*)
文 : 吹水王‧泰利
(*含嚴重劇透,未觀看此片觀眾建議切勿觀看*)
3年前上映嘅《思‧裂》(Split)，除咗令沉寂多次嘅鬼才編導禮切沙也馬蘭(M. Night Shyamalan)東山再起外，最妙之處，係令觀眾冷不提防此片竟係十多年前舊作《不死劫》(Unbreakable)嘅延續篇。當年《不死劫》上映時，禮切沙也馬蘭已表示有拍攝三部曲嘅計劃，只係因影片成績遜於預期，令計劃無疾而終；禮切沙也馬蘭本人亦因作品一再失利而金童本色不在。2015年小成本製作《凶訪》(The Visit)意外賣座，催生出《思‧裂》，以900萬美元成本，打出全球2億幾美元票房。三部曲嘅最終作《異能仨》(Glass)，異能三雄終於聚首一堂，解決橫跨接近二十年嘅恩怨，成為近年最被翹首以待嘅「超級英雄電影」。
《異能仨》故事承接《思‧裂》，講述擁有24種分裂人格嘅怪人Kevin (James McAvoy)從動物園逃出後，繼續擄劫婦女；事件引起在費城當地進行秘密守護工作、人稱「守望俠」嘅David(Bruce Willis)注意，進行秘密調查。終於David發現Kevin藏身之所，與Kevin化身成嘅「野獸」進行生死肉搏；豈料黃雀在後，二人被政府人員生擒，被送往精神病院，由精神病學家Dr.Staple(Sarah Paulson)主導，為二人進行強制治療。而當年被David告發、人稱「玻璃先生」嘅Elijah(Samuel L.Jackson)竟然亦藏身於此病院之中，三雄相遇，原來並非偶然.....
禮切沙也馬蘭，曾經係國際電影界「爭議性」嘅代名詞；佢嘅作品一向以「High Concept」以及「Twist Ending」見稱，坊間往往褒貶不一。有人愛得要死更有人嚏之以鼻。而《異能仨》嘅首輪影評亦係彈多過讚。以個人而言，其實小弟已經收哂貨。原因之一，係影片除咗係一部另類嘅超級英雄電影，亦處處回應緊近年嘅超級英雄電影、文化。
(以下部份含嚴重劇透，請讀者自行斟酌閱讀)
.
.
.
.
.
.
.
例如本片最大嘅扭橋位之一，係Sarah Paulson飾演、表面上悲天憫人嘅精神病醫生，其實係受雇於一個不知名嘅神秘組織，意圖清除社會上所有超級英雄或反派，建立唯一嘅社會秩序。這場佈局，就似乎有點參考Alan Moore原著漫畫《保衛奇俠》(Watchmen)嘅經典橋段，反派「Ozymandias」佈局意圖清除所有超級英雄，為世界重建秩序不謀而合。而最後神秘組織堅壁清野，消滅異能三雄，卻冷不提防「玻璃先生」局中有局，三人家眷連成一線(包括Kevin兒子、Elijah母親，以及上集《思‧裂》的生還少女)，將超級英雄秘密公諸於世，亦可算係一個無異能版嘅《復仇者聯盟》。
而且，禮切沙也馬蘭亦堅持其一貫本色，「Twist Ending」事少而包拗頸事大。事關佢嘅作品一向都係同觀眾包拗頸。《鬼眼》(The Sixh Sense)主角自以為人其實係鬼，《不死劫》英雄唯一知己竟然就係大奸狗；《驚兆》侵略地球嘅外星人竟然怕水，《森魔》(The Village)嘅古代生活竟然只係一種對現世嘅逃避，以及《禍水》(Lady in the Water)以驚慄恐怖片手法拍攝成人童話，往往就係要同觀眾玩包拗頸。所以《異能仨》與其話係漫畫「大事件」式電影，倒不如當係一個外傳起源故事，真正貼近美國漫畫重視內容、架構多於場面嘅叙事手法。當然，玩格局多於場面嘅原因，係影片只有區區二千萬成本，請得一眾明星，場面往往又要好好將就；如果期望英雄打鑊金嘅朋友，本片將不是你的茶，事關最緊張關頭，都係打幾個警衛；更遑論有大場面大動作。
其實禮切沙也馬蘭嘅鬼才，除咗響佢語不驚人死不休嘅結局設計之外，亦見諸於個別嘅角色設計。例如Sarah Paulson飾演嘅Dr.Staple，表面上看來古道熱腸，以科學為先，但到身份揭盅，原來一切公共理性、科學求真，都只係廢話，只係意圖以理性聲音，否定神秘之義，達到維穩效果。將之放於美國甚至世界各地，凡有人提及陰謀論或另類觀點，都總被人冠以神經病帽子。禮切沙也馬蘭如此設計，其Social Comment亦相當明顯。至於本片嘅所謂「Twist Ending」其實有兩重，第一係神秘組織控制大局，將異能仨消滅；但由於這個神秘組織缺乏鋪排，令效果猶如將坊間陰謀論活剝生吞；而第二重「Twist Ending」，講述「玻璃先生」借刀殺人，將醫院錄影帶片段流出，讓英雄傳說公諸於世，則有點為令觀眾滿意收貨而「扭上扭」。不過算係勉強將故事最後一擊留俾「玻璃先生」，符合《Glass》嘅戲名。
部份觀眾指《異能仨》劇本編寫質素平平，有負三部份最終章之名，小弟亦有同感。例如中段寫Elijah在精神病院詐癲納福，閒時卻可以遊走於不同病房、手術室，就過於粗疏；為求令索女Anya Taylor-Joy合理回歸故事，於是硬寫佢飾演嘅Casey竟擁有降服「野獸」嘅「愛的力量」.....實在過於陳腔濫調。甚至以拍攝而言，禮切沙也馬蘭以往極其匠心獨運嘅導演、分鏡手法亦不復再，隨之只係極其經濟嘅商業片拍攝手法，雖然個別場面氣氛塑造仍有水準，但對比起《驚兆》《禍水》等片，已有明顯分別。
不過，《異能仨》響云云超級英雄電影中，仍有其獨特一面，起碼不值得如坊間評論般一面倒喝倒采。《異能仨》打著超級英雄旗幟反漫畫、反英雄，吸收經典英雄故事元素之餘，創作出呢幾個原創味濃嘅特殊英雄人物，起碼已經俾Mavrel (甚而近期嘅DC)濫用公式、力求做到面面俱圓，甚至將宣傳、吹噓情報置於影片內容之前更為之有趣。甚至話說回來，禮切沙也馬蘭絕大部份電影作品，除咗《鬼眼》《不死劫》有較為完整嘅構思外，其他電影作品，都係概念先行、情節只為自圓其說；鬧佢嘅人，又是否過於痴心錯付，當初將佢捧得太高? 佢係鬼才，但亦僅此而已。
香港電影吹水王
https://www.facebook.com/confessionmoviejunkiehk/
國際電影吹水王
https://www.facebook.com/confessionmoviejunkieinter/
吹水王‧泰利
https://www.facebook.com/terryboilwaterkinghk/
(*含嚴重劇透,未觀看此片觀眾建議切勿觀看*)
3年前上映嘅《思‧裂》(Split)，除咗令沉寂多次嘅鬼才編導禮切沙也馬蘭(M. Night Shyamalan)東山再起外，最妙之處，係令觀眾冷不提防此片竟係十多年前舊作《不死劫》(Unbreakable)嘅延續篇。當年《不死劫》上映時，禮切沙也馬蘭已表示有拍攝三部曲嘅計劃，只係因影片成績遜於預期，令計劃無疾而終；禮切沙也馬蘭本人亦因作品一再失利而金童本色不在。2015年小成本製作《凶訪》(The Visit)意外賣座，催生出《思‧裂》，以900萬美元成本，打出全球2億幾美元票房。三部曲嘅最終作《異能仨》(Glass)，異能三雄終於聚首一堂，解決橫跨接近二十年嘅恩怨，成為近年最被翹首以待嘅「超級英雄電影」。
《異能仨》故事承接《思‧裂》，講述擁有24種分裂人格嘅怪人Kevin (James McAvoy)從動物園逃出後，繼續擄劫婦女；事件引起在費城當地進行秘密守護工作、人稱「守望俠」嘅David(Bruce Willis)注意，進行秘密調查。終於David發現Kevin藏身之所，與Kevin化身成嘅「野獸」進行生死肉搏；豈料黃雀在後，二人被政府人員生擒，被送往精神病院，由精神病學家Dr.Staple(Sarah Paulson)主導，為二人進行強制治療。而當年被David告發、人稱「玻璃先生」嘅Elijah(Samuel L.Jackson)竟然亦藏身於此病院之中，三雄相遇，原來並非偶然.....
禮切沙也馬蘭，曾經係國際電影界「爭議性」嘅代名詞；佢嘅作品一向以「High Concept」以及「Twist Ending」見稱，坊間往往褒貶不一。有人愛得要死更有人嚏之以鼻。而《異能仨》嘅首輪影評亦係彈多過讚。以個人而言，其實小弟已經收哂貨。原因之一，係影片除咗係一部另類嘅超級英雄電影，亦處處回應緊近年嘅超級英雄電影、文化。
(以下部份含嚴重劇透，請讀者自行斟酌閱讀)
.
.
.
.
.
.
.
例如本片最大嘅扭橋位之一，係Sarah Paulson飾演、表面上悲天憫人嘅精神病醫生，其實係受雇於一個不知名嘅神秘組織，意圖清除社會上所有超級英雄或反派，建立唯一嘅社會秩序。這場佈局，就似乎有點參考Alan Moore原著漫畫《保衛奇俠》(Watchmen)嘅經典橋段，反派「Ozymandias」佈局意圖清除所有超級英雄，為世界重建秩序不謀而合。而最後神秘組織堅壁清野，消滅異能三雄，卻冷不提防「玻璃先生」局中有局，三人家眷連成一線(包括Kevin兒子、Elijah母親，以及上集《思‧裂》的生還少女)，將超級英雄秘密公諸於世，亦可算係一個無異能版嘅《復仇者聯盟》。
而且，禮切沙也馬蘭亦堅持其一貫本色，「Twist Ending」事少而包拗頸事大。事關佢嘅作品一向都係同觀眾包拗頸。《鬼眼》(The Sixh Sense)主角自以為人其實係鬼，《不死劫》英雄唯一知己竟然就係大奸狗；《驚兆》侵略地球嘅外星人竟然怕水，《森魔》(The Village)嘅古代生活竟然只係一種對現世嘅逃避，以及《禍水》(Lady in the Water)以驚慄恐怖片手法拍攝成人童話，往往就係要同觀眾玩包拗頸。所以《異能仨》與其話係漫畫「大事件」式電影，倒不如當係一個外傳起源故事，真正貼近美國漫畫重視內容、架構多於場面嘅叙事手法。當然，玩格局多於場面嘅原因，係影片只有區區二千萬成本，請得一眾明星，場面往往又要好好將就；如果期望英雄打鑊金嘅朋友，本片將不是你的茶，事關最緊張關頭，都係打幾個警衛；更遑論有大場面大動作。
其實禮切沙也馬蘭嘅鬼才，除咗響佢語不驚人死不休嘅結局設計之外，亦見諸於個別嘅角色設計。例如Sarah Paulson飾演嘅Dr.Staple，表面上看來古道熱腸，以科學為先，但到身份揭盅，原來一切公共理性、科學求真，都只係廢話，只係意圖以理性聲音，否定神秘之義，達到維穩效果。將之放於美國甚至世界各地，凡有人提及陰謀論或另類觀點，都總被人冠以神經病帽子。禮切沙也馬蘭如此設計，其Social Comment亦相當明顯。至於本片嘅所謂「Twist Ending」其實有兩重，第一係神秘組織控制大局，將異能仨消滅；但由於這個神秘組織缺乏鋪排，令效果猶如將坊間陰謀論活剝生吞；而第二重「Twist Ending」，講述「玻璃先生」借刀殺人，將醫院錄影帶片段流出，讓英雄傳說公諸於世，則有點為令觀眾滿意收貨而「扭上扭」。不過算係勉強將故事最後一擊留俾「玻璃先生」，符合《Glass》嘅戲名。
部份觀眾指《異能仨》劇本編寫質素平平，有負三部份最終章之名，小弟亦有同感。例如中段寫Elijah在精神病院詐癲納福，閒時卻可以遊走於不同病房、手術室，就過於粗疏；為求令索女Anya Taylor-Joy合理回歸故事，於是硬寫佢飾演嘅Casey竟擁有降服「野獸」嘅「愛的力量」.....實在過於陳腔濫調。甚至以拍攝而言，禮切沙也馬蘭以往極其匠心獨運嘅導演、分鏡手法亦不復再，隨之只係極其經濟嘅商業片拍攝手法，雖然個別場面氣氛塑造仍有水準，但對比起《驚兆》《禍水》等片，已有明顯分別。
不過，《異能仨》響云云超級英雄電影中，仍有其獨特一面，起碼不值得如坊間評論般一面倒喝倒采。《異能仨》打著超級英雄旗幟反漫畫、反英雄，吸收經典英雄故事元素之餘，創作出呢幾個原創味濃嘅特殊英雄人物，起碼已經俾Mavrel (甚而近期嘅DC)濫用公式、力求做到面面俱圓，甚至將宣傳、吹噓情報置於影片內容之前更為之有趣。甚至話說回來，禮切沙也馬蘭絕大部份電影作品，除咗《鬼眼》《不死劫》有較為完整嘅構思外，其他電影作品，都係概念先行、情節只為自圓其說；鬧佢嘅人，又是否過於痴心錯付，當初將佢捧得太高? 佢係鬼才，但亦僅此而已。
香港電影吹水王
https://www.facebook.com/confessionmoviejunkiehk/
國際電影吹水王
https://www.facebook.com/confessionmoviejunkieinter/
吹水王‧泰利
https://www.facebook.com/terryboilwaterkinghk/