出走華東後記
打完針之後嘅呢半年，俾痛症同好多無厘頭嘅解釋、解讀拉扯住，心情真係六年以嚟最差。成日都覺得人生好苦悶，好想改變吓，突破吓，經歷一啲人生嘅第一次。
見到好多朋友仔喺畢業年都會去畢業旅行，而且咁大個人都未離開過居住地，所以自己都心郁郁，亦問咗好多意見。
有朋友話，台北好，無障礙設施好，食嘢買嘢都好平。
亦有朋友話，台北同香港嘅旺角、銅鑼灣有咩分別？啲路仲難行過澳門。日本好，日本人nice，又多好嘢食，shopping都好爽。
又有朋友話，韓國好，團費平，輪椅出入方便，慳返啲錢第日可以去多個地方。
跟住又有朋友話，韓國難溝通又冇啖好食，馬來西亞好，唔使驚難溝通，食嘢玩嘢都一流……
真係好多謝大家咁踴躍提供意見，但我又無嘢要買，對食又無乜要求，機動遊戲更加唔係我杯茶，咁應該去邊呢？痛咗幾個月嘅頭，呢個時候更加痛。
點知，喺機緣巧合之下，去完澳門無幾耐嘅我，又有一次出走華東嘅機會。
舊年睇完李純恩嘅節目之後，一直都覺得嗰一帶好靚，尤其是蘇杭同青島。既然朋友話青島好多斜路，唔啱我去，咁蘇杭應該都唔錯掛。去就去啦，凡事總有第一次。再唔行開吓，鬆開 “kick” 住我嘅嘢，我驚我真係會痴線。
不過講係咁講，事前我都有好多擔心：擔心自己上落旅遊巴會有困難；擔心自己手腳慢，會連累其他團友等我；擔心華東嘅路唔適合輪椅行，媽咪會推得辛苦，甚至想去嘅景點會去唔到……不過所有嘢都已經搞掂晒，又唔想浪費人哋一番心意；加上母親節第二日就係我嘅農曆生日，都想過得特別啲，所以，只好不停叫自己唔好諗咁多。
帶住興奮又忐忑嘅心情，我終於見識到香港國際機場有幾大，不過喺冇嘢要買又唔肚餓嘅情況下，我寧願搵個位停低睇吓眾生相，或者仲有意義。
到咗集合時間，我就發覺自己之前有啲過慮喇 —— 領隊係一個同我年紀相若﹙其實我老過佢﹚嘅女仔；其他八個團友，係三代同堂，成日笑笑口嘅一家人，佢哋一見到我就主動同我打招呼。十個人一團，忽然間，我覺得好舒服。
五日四夜嘅行程，坐架旅遊巴穿州過省，仲要多數車程都數以小時計，真係好耐都冇試過咁嘅經歷。呢度不得不提吓領隊。其實上落車有扶手同媽咪俾隻手我已經ok，但領隊竟然唔怕污糟，上落都扶住我隻腳，幫我踏落地 / 上梯級，一路傍住直到我安全坐落輪椅 / 旅遊巴座位為止，有幾次我都因為控制唔到而踢 / 踩到佢，真係唔好意思。
人哋話，「上有天堂，下有蘇杭」，真係冇錯架。無論喺邊個角度睇，蘇杭都係一個好靚嘅地方。有機會我真係好想慢慢行，慢慢睇，感受吓晴天、雨天，甚至雪中嘅西湖究竟係點；又或者喺烏鎮同住喺嗰度嘅人傾吓講吓。我諗，我會學到好多嘢。
至於無鍚同上海，俾我嘅感覺就不及蘇杭喇，或者係因為前者嘅行程真係令我太傷太痛，又唔係每個景點都去到；至於後者，雖然外灘夜景真係好靚，但又真係太過繁榮，人多車多到嚇死人，過條馬路都心慌慌﹙不過其他幾個城市都係咁﹚，周圍嘅店鋪又同香港差唔多，照咁睇，喺香港行會舒服啲。
無論點講，今次嘅旅程真係好好彩，遇到好好嘅領隊、導遊、司機，仲有好好笑 & 好好傾嘅團友。佢哋冇嫌我阻手阻腳之餘，去到有樓梯嘅地方又會企埋嚟，睇吓需唔需要幫手抬我上去；見到有坐廁嘅洗手間，又會問我需唔需要去；每晚去到酒店又會叫我哋有事就搵佢哋；聽佢哋互窒，同埋兩歲人仔已經好有禮貌好識表達自己嘅謙謙，真係帶俾我好多歡樂。
再見喇蘇杭，我一定會再嚟探你哋架，等我啊！
見到好多朋友仔喺畢業年都會去畢業旅行，而且咁大個人都未離開過居住地，所以自己都心郁郁，亦問咗好多意見。
有朋友話，台北好，無障礙設施好，食嘢買嘢都好平。
亦有朋友話，台北同香港嘅旺角、銅鑼灣有咩分別？啲路仲難行過澳門。日本好，日本人nice，又多好嘢食，shopping都好爽。
又有朋友話，韓國好，團費平，輪椅出入方便，慳返啲錢第日可以去多個地方。
跟住又有朋友話，韓國難溝通又冇啖好食，馬來西亞好，唔使驚難溝通，食嘢玩嘢都一流……
真係好多謝大家咁踴躍提供意見，但我又無嘢要買，對食又無乜要求，機動遊戲更加唔係我杯茶，咁應該去邊呢？痛咗幾個月嘅頭，呢個時候更加痛。
點知，喺機緣巧合之下，去完澳門無幾耐嘅我，又有一次出走華東嘅機會。
舊年睇完李純恩嘅節目之後，一直都覺得嗰一帶好靚，尤其是蘇杭同青島。既然朋友話青島好多斜路，唔啱我去，咁蘇杭應該都唔錯掛。去就去啦，凡事總有第一次。再唔行開吓，鬆開 “kick” 住我嘅嘢，我驚我真係會痴線。
不過講係咁講，事前我都有好多擔心：擔心自己上落旅遊巴會有困難；擔心自己手腳慢，會連累其他團友等我；擔心華東嘅路唔適合輪椅行，媽咪會推得辛苦，甚至想去嘅景點會去唔到……不過所有嘢都已經搞掂晒，又唔想浪費人哋一番心意；加上母親節第二日就係我嘅農曆生日，都想過得特別啲，所以，只好不停叫自己唔好諗咁多。
帶住興奮又忐忑嘅心情，我終於見識到香港國際機場有幾大，不過喺冇嘢要買又唔肚餓嘅情況下，我寧願搵個位停低睇吓眾生相，或者仲有意義。
到咗集合時間，我就發覺自己之前有啲過慮喇 —— 領隊係一個同我年紀相若﹙其實我老過佢﹚嘅女仔；其他八個團友，係三代同堂，成日笑笑口嘅一家人，佢哋一見到我就主動同我打招呼。十個人一團，忽然間，我覺得好舒服。
五日四夜嘅行程，坐架旅遊巴穿州過省，仲要多數車程都數以小時計，真係好耐都冇試過咁嘅經歷。呢度不得不提吓領隊。其實上落車有扶手同媽咪俾隻手我已經ok，但領隊竟然唔怕污糟，上落都扶住我隻腳，幫我踏落地 / 上梯級，一路傍住直到我安全坐落輪椅 / 旅遊巴座位為止，有幾次我都因為控制唔到而踢 / 踩到佢，真係唔好意思。
人哋話，「上有天堂，下有蘇杭」，真係冇錯架。無論喺邊個角度睇，蘇杭都係一個好靚嘅地方。有機會我真係好想慢慢行，慢慢睇，感受吓晴天、雨天，甚至雪中嘅西湖究竟係點；又或者喺烏鎮同住喺嗰度嘅人傾吓講吓。我諗，我會學到好多嘢。
至於無鍚同上海，俾我嘅感覺就不及蘇杭喇，或者係因為前者嘅行程真係令我太傷太痛，又唔係每個景點都去到；至於後者，雖然外灘夜景真係好靚，但又真係太過繁榮，人多車多到嚇死人，過條馬路都心慌慌﹙不過其他幾個城市都係咁﹚，周圍嘅店鋪又同香港差唔多，照咁睇，喺香港行會舒服啲。
無論點講，今次嘅旅程真係好好彩，遇到好好嘅領隊、導遊、司機，仲有好好笑 & 好好傾嘅團友。佢哋冇嫌我阻手阻腳之餘，去到有樓梯嘅地方又會企埋嚟，睇吓需唔需要幫手抬我上去；見到有坐廁嘅洗手間，又會問我需唔需要去；每晚去到酒店又會叫我哋有事就搵佢哋；聽佢哋互窒，同埋兩歲人仔已經好有禮貌好識表達自己嘅謙謙，真係帶俾我好多歡樂。
再見喇蘇杭，我一定會再嚟探你哋架，等我啊！