褔仔高薪續約值唔值？由佢上一季嘅進步幅度講起

季前友誼賽進行得如火如荼之時，曼聯決定同拉舒褔特續簽長約，留隊至2028年。駐曼市記者Dan Sheldon更加披露，褔仔嚟緊五年合約期會領取£375k嘅週薪，同迪基亞離隊前一樣。呢份糧，反映嘅係佢嘅隊內地位，以及教練團對佢寄予嘅厚望。更重要嘅，係回饋返佢上季東山再起般嘅表現。

而喺呢一切之前，褔仔曾經諗過離隊發展，亦傳聞巴黎聖日耳門想過羅致拉舒褔特。「而家呢個領隊嚟之前，係有少少諗過吓咁嘅，但足球世界就係咁㗎啦。」佢話最後決定留隊為坦赫效力。