隨時係今季最後一戰 藍斯度鬥賓褔特盡力而為

3月9號嘅比賽，週末嘅英超上演「倫敦打吡」，坐落北倫敦嘅阿仙奴將會喺主將佈陣，迎戰西倫敦代表賓褔特。槍手正選門將拉也，今季係由賓褔特外借而嚟，根據條款佢唔可以上陣。被貶後備嘅藍斯度（Aaron Ramsdale），分分鐘係今季最後一次出場。再悲觀啲睇，分分鐘係佢最後一次以阿仙奴球員嘅身份出戰。
因為2020/21球季喺錫菲聯表現突出，藍斯度季後得到阿仙奴羅致，基本轉會費為£24M，加盟後好快就搶走蘭奴嘅正選位置。但經歷兩季槍手生涯後，今季藍斯度反而係被搶走正選位置嘅人，今季只負責英聯盃、足總盃呢兩個本土盃賽，而兩項賽事阿仙奴已經出局。

藍斯度上季打38場聯賽，仲以14場不失球並列銀手套。但因為拉也（David Raya）嘅加盟，佢今季只有前四場正選，之後就一直交由拉也把關，只有對賓褔特嘅比賽能夠上陣。另外，藍斯度亦喺歐聯小組賽最後一場上陣，但當時阿仙奴已經高分晉級，比賽結果無關宏旨。

總結所有比賽，藍斯度今季只有上陣10場，而拉也已經上陣28次。除非拉也受傷或者狀態突然下滑，否則藍斯度今季嘅上陣機會，好可能只得返今個星期六喺主場嘅英超一戰。
撲救表現同數據比較突出嘅藍斯度，對上兩季都為兵工廠把守最後一關，上季嘅經歷，證明藍斯度嘅實力足以喺一支爭冠隊生存。但佢喺應對壓力方面有所不足，拉也唔止喺呢方面比較優勝，佢嘅加盟更加係深化咗阿仙奴現有嘅體系，補上藍斯度傳球能力不足嘅弱點，即使喺高波同穩定性方面較差，都無礙佢搶走藍斯度嘅正選位置。

有兩位優秀嘅門將在陣，領隊阿迪達（Mikel Arteta）今季可謂陷入「幸褔的煩惱」。「佢做得好好，如我所料，每日訓練佢都不斷push緊自己。隊內有兩個頂級門將，實在係太好啦。」
「做領隊其中一件最難嘅事，就係如何處理啲冇得到應有機會嘅球員。唔單止艾朗，仲有好多其他人。我哋有一班令人驚喜嘅球員，會直接同佢哋講解而家嘅情況，體貼啲，提供我哋嘅支持。」阿迪達話，當呢批球員有機會嘅時候，就會盡力去付出。
往績對藍斯度都相當有利，上半季喺英聯盃同英超，阿仙奴都分別作客過賓褔特，藍斯度兩次把關，兩場都贏1-0。第三次對上陣容天殘地缺嘅賓褔特，藍斯度唔單止要保住自己今季對賓褔特嘅清白之身，仲要趁呢場可能係今季最後一場嘅比賽，證明自己有能力為球隊貢獻。