兩球十二碼定勝機 曼聯防反力剋愛華頓｜比賽分析

氣勢比人弱，但三分全取先係重點。兩個十二碼，兩個主將建功，曼聯今季對愛華頓成功斬獲兩連勝。
因為箭頭賀隆、左閘梳爾嘅受傷，曼聯主帥坦赫上星期對曼城已經變陣應對，以三防中嘅陣式打出mid-block至low-block嘅穩守突擊戰術，反擊上極度依賴拉舒褔特、加拿祖嘅速度同爆發力，加上般奴費南迪斯嘅調整，大致令曼聯冇浪費太多機會。

反擊上責任重大，年僅19歲嘅加拿祖上半場喺奧脫褔閃耀全場，開波10分鐘就喺入禁區時假動作fake到達高斯基出腳鈎跌。之後上半場中段又喺跑過愛華頓禁區時，被賓葛菲踩中腳趾仆低。兩個犯規，兩個十二碼，般奴同拉舒褔特先後操刀中鵠。之後有一次左閘米高連高波中手，但球證冇表示，否則加拿祖今場有可能三次為曼聯搏得十二碼。
比起曼聯全新嘅踢法，愛華頓嘅4-4-1-1陣式今季叫做踢慣踢熟，進攻時都明顯搵到曼聯嘅一啲漏洞。早早領先兩球，曼聯當然最好就hold住球員，避免比愛華頓有搵到弱點嘅機會。但坦赫呢兩場嘅陣式始終喺反擊上先有比較好嘅表現，正選收起安東尼、艾歷臣，喺控球在腳時難免會有啲阻滯。中場最有路數嘅卡斯美路，上半場更多次傳球失誤。

更甚者，曼聯喺控球上嘅不足，進而暴露咗一啲由攻轉守嗰一刻嘅缺點，華拉尼、拉舒福特先後有失誤，隨之而嚟嘅就係愛華頓嘅射門，但都考驗唔到奧拿拿。呢位全季表現不穩嘅門將，今日面對愛華頓6個中龍射門全數救到，特別係愛華頓翼鋒麥尼爾今日狀態大勇，但都過唔到奧拿拿十指關，繼上一場對曼城之後，再次打出爭氣嘅表現。
愛華頓全場爛船當有三分釘，但兩球落後都係事實，主帥戴治喺60分鐘換人唔變陣，繼續保持主導球賽嘅形勢，但個波就係唔入網。主力箭頭卡法路雲呢兩場波都後備上陣，75分鐘浪費一個大好機會。
喺主場三分全取，曼聯追上前四嘅希望仲未消滅，眼見英超賽程已經進入最後1/3，坦赫最近嘅變陣見到𥌓光。