陳志雲批評TVB似ATV 請多100個叻過曾志偉都係冇用

陳志雲最近接受商台節目《我俾子君焫着了》訪問坦誠分享自己對於TVB現時嘅睇法。
對於而家TVB點樣睇，陳志雲說：「而家嘅TVB好似變咗以前嘅ATV，我諗係同佢嘅品牌效應、負面效應有關。」 陳志雲話2012年 當年選擇離開TVB係因為知道咁樣發展落去情況會變壞，他說：「唔係我要放棄呢隻沉緊嘅船，而係我見到新媒體嘅興起，所以我係想離開去學新媒體嘅嘢。當時我見到佢有咁嘅走勢，但佢未必一定會下滑，如果佢轉得夠快，動作轉得夠大，咁可能唔需要走條咁嘅路。」
陳志雲話當年佢喺TVB仲做緊嗰陣， TVB仲未變成而家咁嘅情況。 他表示：「我冇份搞到隻船開始沉，哈哈！以前海外市場，你做嘅嘢by product係唔需要成本，已經賺到錢，但而家海外市場已經唔係咁，大家開始自己製作節目，大家會喺新媒體入面睇節目，你就見到市場對你嘅依賴減低。」對於TVB而家嘅情況有咩需要改善嘅地方！ 陳志雲話TVB太過依賴自家製作，所以難免會工廠式，好難跳出框框，其實全世界的劇集題材都差不多，但最重要係識得包裝同加入新元素。 他隨即表示：「老實講，TVB唔係個個節目都做得咁差，有啲都係唔錯，只係大家離棄咗佢，我曾經講過就算請多100個曾志偉，請多100個叻過曾志偉好多倍嘅人過嚟都係冇用，因為人哋覺得呢個品牌嘅價值係負面。佢一定要由裡面改番出嚟，全個機構嘅文化、定位、價值觀要改，失去嘅觀眾先會返番嚟。」陳志雲喺TVB度做嗰陣其實都仲係屬於最黃金輝煌嘅時期，對TVB嘅睇法唔多唔少都係而家嘅真實情況。