【網民熱話】港女自製男性職業評分表被鬧爆
正所謂「職業無分貴賤」，如果單憑對方的職業就對其作出評價，相信大部分人都不會認同。不過，最近網上就熱傳一份由一名港女製作的男性職業評分列表，製作者對不同工種由高至低評分，引起大量網民怒轟。
製作者列出二十多個職業，並把其分成高、中、低級三組，且逐一評分。評分最高為10分，最低為0分，製作者對該職業評分後，還會加上自己的評語，例如：「文員，冇前途，呢種人多數意志力弱，冇野心，冇上進心，人工又低，1分」。
她又指機師及演員因人工高、有魅力等原因值8分，司機則獲2分，地盤工人更差至不予評分。而在評分表中，最高分者為企業管理人員，最低分則有清潔、跟車、地盤等職業。製作者還於表末稱，希望各位女網友「揀男人時要記得留意職業」。
雖然製作者的列表相當詳細，但不少網民都表示不認同，又指製作者只當男人是提款機。也有人反問製作者自己值幾多分，「莫道你在選擇人，人亦能選擇你」。亦有網民指評分無聊，更大鬧其不知所謂，指製作者抱這種心態，永遠都不能找到真愛。
可憐的小編原來只值2分…
原文引用自討論區
因為成日同姐妹傾男仔職業，興致一起，就想列哂出黎
高級：(7-10分)
律師 - 人工高, 香港律師唔算多, 如果case打得好好易出名, 到時更加高人工, 而且學識高, 見識廣, 可以帶俾你唔同既人生, 認識極多有錢佬, 結婚後可以踏入上流社會生活 9分
企業管理(老闆CEO等) - 當然係講穩定既公司而唔係細公司, 私人公司人工一定最高 , 月入幾十萬唔出奇,甚至更高, 一定唔洗為錢頭痕為錢煩, 可以專心湊仔shopping都得. 做得呢個位IQ一定好高, 咩問題都可以解答到你, 睇人又好準,呢種男人好有魅力, 10分
機師 - 周圍去唔同地方, 帶俾你唔同文化經歷, 每講一個故事都有一分浪漫 , 人工亦高, 唯一缺點係日夜顛倒 , 8分
政治家 - 有權力既男人認真既時候好man , 可能香港每一個決定都關佢事, 自豪感最高, 做到上去人工都好高 , 不過缺點就好多 , 通常城府好深 ,你永遠唔知佢諗咩, 同埋政見一唔同就死 , 7分
銀行家 - 一個字, 錢, 唔需要令你煩錢呢樣野, 已經好高分 , 但比起其他高級職業略遜一籌, 7分
導演/演員 - 你諗下, 如果你男朋友/老公係李安,劉德華,劉青雲,郭富城咁,你會點? 缺點係太多誘惑, 結左婚都好易因為拍戲動真情 , 8分
建築師 - 全香港都有佢設計既蹤跡, 可能佢帶你行街係帶你去睇佢設計出黎既商場/樓宇 , 成就感高, 人工亦非常不錯. 7分
中級：(4-6分)
西醫/中醫 - 醫生人工高, 多數都溫柔, 而且學識廣, 我成日肚痛, 身體有咩問題都可以叫佢幫手睇下, 仲可以即刻開藥俾我食, 雖然要輪班, 6分
護士 - 男人做護士, 可能我保守, 聽上去感覺有d差, 而且要輪班,但人工算ok, 5分
政府工(警察消防救護等) - 人工雖好 , 有政府福利, 前途穩定, 但醜聞太多, 聲譽好差 , 5分
老師 - 學識理應最高, 教育亦係一件好偉大既事, 而且第時生仔女仲可以親自教 ,人工又ok , 6分
Sales - 人工好飄忽, 不過做得sales應該幾靚仔, 而且口才一定好, 唔驚冇人哄 , 4分
會計師 - big4 人工都好工下, 不過好辛苦, maybe 40歲唔夠就甩哂頭髮, 同埋冇時間陪自己, 5分
創作(畫圖設計等) - 做得呢d多數幾有心思, 雖然人工唔高, 但有時會弄小禮物/ 畫圖俾自己, 好浪漫 - 4分
廣告/拍片 - 人工幾低, 又會成日OT, 但鬼主意好多, 唔會悶親自己, 拍拖一定好開心, 同埋一定識影相, 唔會影到自己又肥又矮 - 4分
低級：(1-3分)
揸車(巴士的士等) - 沉悶工作, 多數學歷低 ,只有一種技能 , 但人工還算穩定, 唔會咁易俾人取代 ,2分
IT - 人工雖高, but多數係樣衰毒男 ,開口埋口剩係講電腦, 零情趣, 1分
文員 - 冇前途, 呢種人多數意志力弱, 冇野心 , 冇上進心, 人工又低 , 1分
髮型師/化妝師 - 多數係gay,唔係gay都會乸乸地, 我最憎,但可以自己慳番好多錢同功夫, 出名既話人工亦好高 , 3分
作家/靠支筆搵食 - 人工飄忽過sales, 同埋今時今日好少人仲睇小說果d野, 不如睇戲好過 ,但多數浪漫, 應該識哄女仔, 2分
Lab - 人工唔知, 但應該都ok? 不過接觸化學藥物多, 遲早身體有事, 可能我岩岩40歲你就已經去左 , 2分
廚師 - 除左做大廚外, 普通廚師/廚房佬冇咩吸引, 最多番屋企自己唔洗煮飯食 , 2分
地產- 雖然人工可能好高, 但唔好以為著西裝就係專業人士, 成日睇報紙見到d地產佬打架, 又跪係到求人買, 覺得好醜 , 1分
保險- 好過地產, 但感覺上有d呃人成份, 同埋d保險佬成日放上facebook哂命好核突, 1分
唔會考慮 ：(0分)
店員、清潔、跟車、粗重野、冷氣水電地盤等等
俾各位sis過目下我地既心得, 希望各位sis以後揀男人時要記得留意職業呀~~~