【你睇落好細個喎】童顏的好與壞

小朋友一見面就喜歡鬥邊個歲數大邊個就有得做大佬，人大左，個個就喜歡扮細個隱瞞年齡，一比人話你後生就成日都keep住有個好心情。雖然個樣生得細個啲，比人讚你後生keep得好，好多時真係會暗地裡自high，但童顏係咪真係咁好呢 ? 除了個樣細個啲之外，在工作和生活上其實都有好多麻煩不方便，甚至尷尬的情況發生，即刻同你逐一拆解童顏的好與壞！
1. 睇落後生
有邊個不喜歡比人讚後生 ? 特別係女士們，個樣生得Q啲、有啲baby face，係人都估你得嗰十八廿二啦！比人估細啲，好過比人問你係咪已經去到準備退休的年齡啦！何況而家咁輕小鮮肉、凍齡和逆生長，童顏的咁多位就唔洗擔心會比人當街叫你叔叔、姨姨啦！

2. 容易比人睇唔起
冇錯！擁有一副童顏的人，其實都只不過係持有一張與年齡不相符的臉龐而已，佢地都是普通人一個，甚至有可能會遇到啲非童顏的人冇經歷過的麻煩！出到嚟社會工作，個個見你成個中學生咁嘅款，係人都覺得你冇料到啦！面試的時候上司、高層仲有機會覺得你唔夠成熟穩重，驚請你番嚟冇啲擔帶、做唔掂份工添！特別係金融界、地產、保險業或者教育界這些着重形象和權威的行業，外貌上帶幾分輕挑稚氣，無論係上司、同事、客人定係家長同學生，都可能信唔過你，到時就真係冇咩着數喇！不過大家確實不應該以貌取人嘅，童顏又好，非童顏又好，有能力的人去到邊都會得到賞識嘅！
3. 下下都比人查身份證
擁有一副童顏的人，大概都經歷過這個問題！去酒吧嗌杯野飲，check ; 去機舖玩番局賽車，check ; 去馬會買場六合彩，未入到去就已經比人截住左，check ; 連去便利店想買枝啤酒飲下都比人叫出示番身份證！真係火都嚟埋！明明夠曬秤，行得正企得正，係都要在大庭廣眾之下比人核對年齡！好似當正我係嗰啲未夠16歲嘅o靚仔想偷偷地入機舖玩咁！不過講到最尷尬、最唔想比人查身份證的處境，一定係同緊一大班女仔friend落pub玩時，下下比人check身份證，成班朋友一直細路、細路咁嗌你，都咪話唔嬲！

4. 容易令人誤會同其他人的關係
明明同另一半去行街睇戲係一件好sweet嘅事，但如果你個樣生得細個啲，分分鐘會比人誤會你地係兄妹或者姊弟！所以話，拍拖嘅話，無論係男定女，自己定對方係屬於童顏嘅嗰一個，比人誤會二人關係真係會好尷尬好冇面，明明年紀細過個男仔，就因為對方生得細個而比人笑自己湊細佬放學 ; 明明同個女仔同年，就因為對方有個童顏樣而比人話父女戀、撩妹妹仔，誤會情況越加發生的話，真係有機會導致情侶之間因為自卑感而引發嘅衝突㗎！

5. 比人問年齡問到人都炆埋雖然話冇人係會嫌讚美的說話多得制，但成世人流流長，出親街都比人用驚嘆的語氣同你講「下！睇唔出你咁大個喇啵！」或者「下！我仲以為你讀緊中學咋！」，其實已經唔覺得係一種對童顏的讚美，相反仲要同對方解釋一大輪「其實我已經成三十幾歲人」、「其實我已經出左嚟做野好幾年」，呢種咁嘅比人誤會身份、應付所謂的驚訝神情、聽人點樣以為你幾多歲、再強顏歡笑澄清自己的實際年齡無限loop童顏定律，真係少啲心血都忍唔到，真係辛苦曬咁多位童顏人士！

凡事都冇100%好或者壞，你好羨慕人地有張baby face，顯得細個啲又後生啲，但童顏所招惹的一切工作和生活上的煩惱，你又係咪咁羨慕呢 ? 不過，我相信只要人有自信、喜歡自己，童顏定唔係童顏，都一樣可以擁有精彩美滿的人生嘅！