【犯眾憎】辦公室8大惹人討厭行為

出嚟做野咁耐，總會遇過幾個特別乞人憎嘅人，呢類人俗稱「犯眾憎」，同事們不單只討厭佢，仲會喺背後講佢壞話！唔想成為左犯眾憎的一位？以下綜合辦公室8大惹人討厭的行為，睇下有無你份，廢事做左啲令人厭惡的行為都唔知就唔好喇！
1. 遲到
守時係美德，忍耐雖然都係，但如果你持續遲到的習慣，唔覺得自己有錯，甚至多多藉口的話，咁就真係忍無可忍喇！明明約左你十點鐘開會，你十點三先斯斯然行入嚟 ; 約好左兩點鐘一齊去灣仔見客，你兩點先話在旺角出發，叫人點忍你啊！要知道，遲到對每一個準時的同事是非常不公平架！

2. 返工做私人野
公司請你返嚟係做野，而唔係傾電話、煲劇、淘寶和搶平機票！唔該諗下咩場合應該做咩野先啱 ! 無謂影響到其他同事的工作進度！

3. 曬命
每間公司都總有一、兩個，唔曬下自己有幾有錢、有幾巴閉就會死的人，食親飯都同你呻下佢男朋友送左個咩名牌袋比佢、uncle帶佢去試幾多年的紅酒、今個月又加左幾多人工，真係冇太陽都曬死。
4. 搞小圈子
學是學非呢，並唔會幫到你明辨是非的，只會顯得你多口、麻煩、冇朋友。做得是非精，就只能夠靠傳下人地緋聞、講下人地八卦、篤下人地背脊嚟交換人情，其實分分鐘比人排斥緊嘅係你咋！

5. 食野唔做野
明明唔係唔識做野，但free rider就越嚟越多，個個都好食懶做。難道勤力的人真係太多，令到唔少人冇野好做，日日都係返工等放工？世界就係因為有呢種食野唔做野的人，令各位同事要一個人做兩個人嘅野！

6. 愛吹牛
總有啲人鐘意靠吹噓自己嚟吸引同事的注意力，話自己識人可以預先買到新款手機、睇演唱會可以有免費VIP飛、成日都有sponsor野用，但次次問親佢可唔可以幫手買野嘅時候，唔知點解佢都幫唔到手。

7. 有埋怨冇貢獻
打工仔邊個唔辛苦？但總有啲人剩係會睇到自己，終日都喺度埋怨太多野做、公司太刻薄。其實人人都係咁捱，不如出少句聲做啲成績出嚟？

8. 博上位
講到最討厭，應該都係嗰啲為博上位，利用人地的偽君子！未得逞的時候就左拜託、右拜託你，上左位就拜拜你條尾！呢種人仲要冇樣睇！想防都幾難！
每間office都總有啲乞人憎的同事，但其實以上某啲行為，相信人人都做過。面對唔係咁討好的同事，嘗試多啲接納同溝通，或者佢地都唔係你想像中咁差姐！但如果對方屢勸不改，就要同佢保持距離喇！