【有錢收有得玩】6種邊做邊玩筍工

個個都話打工好辛苦，日日坐喺office番工等放工，有時真係好想拿拿臨退休去環遊世界！可惜有冇錢係一個好大的問題！不過！原來世上真係有啲工種係專比錢你去玩、去享受！工作內容仲一啲都唔辛苦！根本就係攞正牌去歎嘛！
1. Travel blogger
打工仔成日都想去旅行散下心、暫時離開一下煩悶的工作環境，做travel blogger就真係可以一次過滿足曬兩個願望！有得去唔同地方食好野、睇靚景，體驗下當地的風土人情，每次工作都係一次美滿的旅程，仲有得claim番公司數，會唔會太吸引？

2. 試食專員
上網成日碌到啲咩「葵廣新開張日本紫薯撻」、「大埔街坊價大碗正麻辣米線」，究竟係邊個咁得閒又咁消息靈通，一有新食店開張就走去試食呢？咪就係一班收錢去食好野嘅試食專員囉！最新、最潮、最好味嘅野食，通通都落曬佢地個胃度，仲成日有特別招待，好正啊！

3. 知名YouTuber/作家
收人工去歎世界，唔一定要係大明星先得嘅！好多社會上有少少人識嘅YouTuber或者作家，都成日會收到啲廣告商的邀請，去睇電影優先場、去餐廳食下自助餐、去台灣參加下藝術展、免費用下護膚品sample、去主題樂園率先玩下新game等等，番到屋企只係需要up下相幫手promote下、讚下有幾好玩就搞掂，真係好葡萄啊！我都成日up食物相，又唔見有人請我做打手？
4. 動物照顧專員
平時我地見到啲可愛的小動物都會好想養番隻，但養寵物唔係一時之間可以決定到的事。冇時間但又好想養小動物？動物照顧專員就真係啱曬你做！由朝到晚都可以抱住啲小動物，佢地開心你又開心！

5. 電影放映員
今時今日想話去睇下戲都咁鬼貴，如果我係做電影放映員就好喇！播緊電影嗰時可以有冷氣吹、有得hea、有得抖，最重要係有得睇最新上映的戲！中、日、港、台、歐、美咩戲都有得你睇！睇到你嫌悶添啊！

6. 演唱會帶位員
每次話請演唱會帶位員，都總會引來一陣騷動！事關做演唱會帶位員真係正到爆！工作時間有彈性、時薪高，最緊要係有得免費睇show！啲演唱會飛幾難撲都唔關我事！天王開concert都可以10場全睇！只係要一心幾用辛苦啲姐！

人人都嫌番工辛苦，個個都羨慕其他人可以搵到份筍工，收住錢歎世界。其實世界上邊有免費午餐食？每一份工都有佢嘅辛與酸，不如做好自己本份，嘗試在工作中尋找快樂！