【拍片人生】YouTuber的快樂辛酸史

而家呢個由網絡主導的年代，無論係煮飯、整甜品、打機、化妝、淘寶或者試食等等，都已經唔再興拎住本書逐個逐個步驟跟住嚟學，只要上網search下個關鍵字，就會有成十幾廿條短片彈出嚟幫你！睇 YouTube的人多左，自然就多左人拍片放上YouTube，造就左好多YouTuber的誕生！平時大家睇啲YouTuber成個明星咁又有廣告代言，又唔洗番工坐office，日日就剩係坐喺屋企或者去旅行拍片，但其實YouTuber的生活又係咪真係咁令人羨慕呢？一齊睇下做YouTuber有咩苦與樂啦！
1. 提高知名度
想搏出位？想出名？想入行做明星？想做model？拍片po上YouTube的而且確是一個唔錯的途徑。有部份YouTuber就係因為拍片，同其他人分享畫畫、化妝、襯衫，或者打機的心得，慢慢累積了一班「粉絲」，更加透過YouTube認識到更多行內行外的人士，曝光率自然就高左好多，亦都多左機會參與玩YouTube以外的活動，可能係歌唱事業、電影圈、出版界，甚至模特兒界等等，隨時一夜之間就搖身一變大明星！仲有近排好hit嘅KOL (Key Opinion Leader 微領袖)，做得KOL追隨者一定有返咁上下，唔少廣告商都願意花錢請KOL去做一啲軟性廣告或植入式廣告，所以愈嚟愈多年青人去嘗試做YouTuber。

2. 金錢收益
好多人葡萄YouTuber的生活，唔洗番工，拍下片就有錢收。當然，只要上載video去YouTube時，啟用帳戶的獲利功能，同時有一定人數瀏覽你的短片的話，你就可以透過google adsense，在YouTube的廣告收益中分一杯羹架喇！其次，有啲專攻時尚服飾或者化妝品的YouTuber，久而久之就會成為特定行業或群眾嘅KOL，可以吸引到廣告商的招徠，幫客戶拍片賣廣告來賺取外快。但大家千祈唔好以為一開始拍片就可以賺大錢，好多成功的YouTuber未紅之前都要不斷摸索觀眾的口味，慢慢先拍出自己的風格。
唔少本地YouTuber啱啱開始拍片的時候，都係得3-4位數字的收入，所以大家想考慮做一個全職YouTuber之前，都係累積多啲瀏覽量先啦！當然，係外國有唔少嘅成功例子，表表者一定係27歲瑞典的PewDiePie，佢係YouTube分享打機影片，現時佢嘅YouTube頻道已經有超過4,900萬人訂閱，影片觀看次數逾130億，2015年單是透過YouTube已經賺得超過1,200萬美金，差唔多1億港紙，非常誇張。

3. 化興趣為事業
好多後生仔前途無可限量，但又唔知應該喺邊度表現自己至好，而互聯網正正就係一個大好平台 ! 你鐘意唱歌、跳舞、化妝、打機、食野，定係捉精靈，拍條片上YouTube就已經係為自己投資左個機會，還掂upload又唔洗錢，拍得片又預左會有人睇，加番個夠曬吸睛嘅標題兼叫朋友幫手share，分分鐘你就係下一位網絡紅人喇 !

4. 被人說三道四
人紅自然是非多，呢句說話同樣可以應用在一眾YouTuber身上。原本只係想同其他人交流一下心得，比自己一個平台發揮所長，點知po左段片唔夠一個星期就比人起曬你底，拍化妝片又比人笑你肥話你醜 ; 唱歌又比人嫌你走曬音 ; 拍個talk show又比人寸你做作，日日都要受咁多無厘頭嘅氣，真係EQ低啲都死 ! 不過呢個世界就係咁，你生得幾靚都好，總會有人問你係咪整過容嚟，想學人拍片，就要先學識接受批評喇 !
5. 揮灑時間、心血和金錢
要成名就要先裝備好自己、等待適當的timing，拍片都係一樣，冇人一嚟就成功日日幾十萬個view，所有當紅的YouTuber一開頭都係靠自己睇書、上堂學剪片、認識互聯網的市場動向、努力吸引觀眾的眼球，仲要成日洗錢買靚相機、靚鏡頭、剪片software等等，最重要嘅就係，拍片要付出好多連錢都買唔到的心機和時間。無論係學剪片定真係開始拍片，YouTuber前前後後都要花好多心血和時間，換來的可能只係一千幾百個view、廿蚊都冇嘅廣告收益，甚至要受人評頭論足。可想而知，其實做YouTuber拍片，啲錢都唔係賺得咁輕鬆架 !

呢個世界總係你睇我好、我睇你好，日日loop YouTube總係覺得啲YouTuber生活好多采多姿，拍條片就可以搵到食，工作時間又自由。其實每份工作都有佢的樂與苦，啲YouTuber剪片剪到成隻狗咁唔通佢又會同你講咩 ? 計我話，最重要就係享受你做緊的工作，幾辛苦自然都會樂在其中啦 !