【情人節】臨急抱佛腳下可以做的事

新年過後，眨吓眼又到情人節。情人節係唔少女仔最期待的節日，為另一半準備驚喜和DIY禮物，冧下對方之餘，仲可以乘機放閃呃like ! 不過，香港打工仔咁忙，總有啲人 (通常為男方) 會唔記得左book餐廳食飯，或者醒唔起要買禮物，仲有幾日，或者得番幾個鐘時間準備的話，可以點做呢 ?
豪華版:
用錢解決
一到情人節，除了快餐店同大排檔，大概全港所有平靚正的餐廳都會被book清光，時間無多，你只有五星級酒店自助餐或者燭光晚餐的選擇，怪就怪你自己唔夠快手又冇記性，搞到要捱成千幾二千蚊個飯，唯有之後慳啲洗啦 ! 不過如果比你女朋友知道你冇預先book定檯食飯，後果應該會更不堪設想。

買最貴的禮物
為了掩飾自己唔記得買禮物的心虛，最好就即刻買番份又貴又靚的禮物 (如名牌手袋、唇彩、披肩、首飾) 補鑊，起碼都叫做有買到啊 ! 就算禮物唔係好啱對方心水，憑金額都顯示出你的誠意啊 ! 冇心都叫有金啊 !

捱貴花
情人節當日先嚟買花就一定貴到癲架喇 ! 鬼叫你冇心裝載咩 ! 如果係送比女方嘅，就幾貴都要頂要硬上架喇 !
即刻買飛去主題公園
冇諗到節目 ? 唔緊要 ! 去主題樂園就唔洗煩啦 ! 去到有咩玩咩，氣氛又一定夠曬romantic，慳番好多工夫，只係去一次都唔平啊 !

平民版:
買餸玩煮飯仔
冇咁多錢食酒店自助餐，咪自己煮囉 ! 超市一塊牛扒都唔洗一舊水，插枝蠟燭、準備枝平價紅酒，再播番首華爾滋，浪漫到邊個都招架唔住啦 ! 而且，煮燭光晚餐要當日先買餸，可以解決唔記得左book檯食飯的疑雲，對方絕對唔會懷疑你冇準備，掂 !

買外賣
唔識煮飯又唔記得左book位食飯點算好 ? Call外賣就係你唯一的救星，不過千祈唔好買pizza、炸雞咁求其，買都要買啲女仔會鐘意的貴價壽司、韓國菜等等，甜品再加個朱古力噴泉，兩個人一齊點下水果，點下雪糕咁，都幾sweet啊 !

買手工藝品扮自己整
雖然講大話係唔啱，但唔想激嬲另一半的話，情急之下都係要講善意的大話。在沒有買禮物的情況下，一於拿拿臨去書局買啲已摺好的星星、紙鶴、玫瑰花，或者係已裁製好的皮革品，再放入個玻璃樽或者紙盒度扮係自己整，對方收到以為係你親手製作，一定會被你感動到 !
唱歌
冇買禮物唔緊要，最重要就係冧到對方。在時日無多的情況下，唯有練熟幾首情歌，準備枝唱K咪，甚至出動埋結他自彈自唱，唱番首〈每天愛你多一些〉，或者〈愛很簡單〉，總之有幾肉麻就得幾肉麻，對方應該睇唔出你冇準備嘅。

自製/複製心意卡
在呢個網絡泛濫的年代，基本上咩都搵得到。唔記得準備禮物或者唔夠時間買，唯有駛出殺手鐧 : 上網copy啲心意卡，或者求其用software將人樣轉做卡通樣扮係自己畫送比對方，應該都可以蒙混過關嘅。

其實情人節又唔一定下下都要送禮物、送花、諗節目嘅，兩個人開開心心食餐便飯，喺屋企開隻DVD睇，都可以好浪漫 ! 只要係愛對方嘅，每日都可以係情人節啦 !