從零開始！電單車考牌 流程全攻略 （超詳細，2021最新）

顯示分享連結

筆試、強制試、路試？別再傻傻分不清！
要拎到電單車牌，你需要順次序通過「筆試」（甲部試）、「強制試」（乙部試）和「路試」（丙部試），總共三個考試。「筆試」同「強制試」需要捆綁一齊報名，但是「路試」（丙部試）則可以分開報名，你可以自由選擇適合自己的路試課程和導師。

如果你曾經考過筆試（例如考其他車牌時已經考過筆試），你可以豁免應考「筆試」，直接由「強制試」開始。

考牌要幾耐？視乎你考邊度！
一般而言，從零開始到合格，順利的話，最快可以1年左右拎到牌。

「筆試」考期和頻率頗為固定，並無捷徑，想更快拎牌，秘訣在於精明地選擇「強制試」和「路試」試場，有些試場的排期時間會相對快。例如「路試」排期最快的街場，是港島區掃桿埔（又稱銅鑼灣、大球場），一般只需排3至7個月不等，而九龍區天光道則要耐一點，一般要比港島等多5至12個月不等。


你可以按此瀏覽運輸署最新的考期。


記住哦，如果你路試不合格、要重新排期考路試的話，下次排正常期都係根據上面呢個等後期。


報名程序和注意事項
第一步，當然是報名啦！「筆試」和「強制試」須要綑綁同時報名，報名前，你需要決定去哪一個考場學習強制課程和應考強制試。如果你不想「路試」被綑綁報名，你便需要親身到這四間政府指定駕駛學院報名，分別是：


（1）小瀝源駕駛學校：沙田小瀝源沙田圍路138號

（2）元朗駕駛學校 ：元朗涌業路38號

（3）鴨脷洲駕駛學校：鴨脷洲利南道68號

（4）新觀塘駕駛學院：觀塘有信街8號


頭三間駕駛學校的報名系統是互通的，也就是你可以去「元朗報名，鴨脷洲上堂」，反之亦然。新觀塘駕駛學院的系統則不能互通，如果你希望在觀塘學習，你只能在觀塘報名，同理，觀塘並不能為你辦理另外三間學校的報名手續。


特別注意（1）：你不能去運輸署報名，你需要去指定駕駛學院報名。

特別注意（2）：你不能報淨筆試。運輸署的邏輯是三個考試都屬於同一張路票（考試費用）。

特別注意（3）如果你曾經考過筆試（例如考其他車牌時已經考過筆試），你可以豁免應考「筆試」，直接開始學習「強制試」，但是由於上述考試費用（路票）嘅概念，運輸署並唔會因此減價。


額外知識：駕駛考試，背後都係「佢」
有4間駕駛學院，你係咪以為自己「強制試」有得揀呢？其實以上所有4間「政府指定駕駛學院」，都係由同一間私營公司獨市經營（新聞報導），背後老闆係有「重慶李嘉誠」之稱嘅張松橋，連西隧都係由佢公司持有。就算你見到其他MEG、 A1等等駕駛學校，好多人都知背後都與香港駕駛學院有著千絲萬縷的關係。（相關報導）


雖然「強制試」你無法有真正嘅選擇權，但係「路試」就係由你話事，你可以自由選擇跟邊個導師，唔需要再俾駕駛學院綑綁。


輝Sir都係時候「利申」一下，我就係其中一位（唔屬於以上駕駛學院）嘅電單車「路試」師傅。我寫呢啲資訊，除咗係想你認識我之外，更加希望你可以了解多少少香港嘅制度，支持公平同公開嘅自由市場，因為有競爭先有進步，咁先可以令到呢個行業提供嘅服務越來越好。


筆試（甲部試）
報名時，指定駕駛學院會俾一本「道路使用者守則」你，裡面包括曬所有會考嘅駕駛知識。2020最新版本是藍色的，而舊版本係黃色封面（足足用咗20年！），記得唔好用錯。報名後你會拎到筆試考期，大概1個月後，你就會應考筆試。



考試限時20分鐘，答20題多項選擇題，每題3選1；答對16題（即係80%）或以上，就算係合格。基本上你有溫書都會合格，網上亦有大量模擬試題。

雖然叫「筆試」，但係你唔需要帶筆，全程用電腦應考。你只需要帶（1）香港身份證或其他認可身份證明文件，例如護照（所示的證件須與運輸署記錄相符；如有損毀或逾期者將不被接納） ，同埋（2）考試排期信。
按此查看 筆試 Q&A

強制試（乙部試）
筆試合格後，你需要聯絡你報名考「強制試」嘅駕駛學院，佢會核實你係咪筆試合格，同埋會同你處理報考「強制試」嘅詳情，一般最快可以喺1個月內開始上堂。


「強制堂」一共3堂，每堂4小時，總共12小時。你可以選擇連續3日上堂，或者分開上，確實課堂日子請向指定駕駛學校查詢。課堂內容包括電單車理論課，例如基本結構、操作等等，亦有部份時間俾你上車實戰。第一堂接觸電單車，可能會容易啲死火同是平衡，俾啲時間就可以習慣同放鬆，唔好太擔心。學強制試之前，記得唔好錯過呢啲免費貼士。

上完之後會有張證書仔，你必須完成「強制堂」先可以應考強制試。強制試考試內容包括：開車、停車、平路超大8字（「斜路8字」並非強制試項目）、緊急剎車。


有部份駕駛學院會係要求你上完曬所有強制堂，先可以排期考強制試；亦有部份駕駛學院喺你筆試合格之後，就會俾你排期考強制試（有考期），然後再同你夾幾時上堂。


輝Sir建議考強制試前1個月就好上完所有強制堂，咁你就可以喺考試前有足夠時間練習，而練習亦可以無咁受天氣影響，早幾日睇定天氣，落雨就唔book補鐘加堂。


上強制堂嘅時候，雖然駕駛學院有頭盔可以借，但除咗有陣異味之外，仲有機會唔Fit你個頭盔，俾唔到足夠嘅保護你，輝Sir強烈建議你買個頭盔同買對手套先上堂。我拍咗一個【電單車新手裝備】網上課程，3集免費影片幫你揀一個適合嘅頭盔同其他配件，立即收睇啦：

強制試合格後，如果你當初並無綑綁報路試，你而家就可以自由選擇路試考場同師傅了！強制合格後7個工作天起（最遲3年內），你要去運輸署辦理學牌，街場（非學院考場）可以選擇九龍天光道或者港島掃桿埔，辦理手續後你會收到學牌同路試考期。呢個程序係可以搵人代辦嘅。


路試（丙部試）
考試之前最少2個月開始學，如果真係發覺自己學習進度唔夠快，都有時間可以額外操練。雨季學車嘅同學就最好預多一個月，避免因為落雨而學唔夠車。


路試主要有兩個部分，分別係「斜路八字」同「路面實戰」。「斜路8字」顧名思義就係考你喺斜路上打8字，大概有1-2條行車線咁闊，考驗你喺斜路上掉頭嘅能力。至於「路面實戰」，考牌官就會睇你喺指定路線上嘅表現，有無展現出你有細微嘅觀察、敏捷嘅反應、清晰嘅馬路知識。



無論考試定學車，你都唔一定要租出面嘅車，你可以用學牌身份買一架自己嘅車，不過就記得考慮埋保險價錢、架車適唔適合考試、保險有無包括駕駛考試等等嘅因素。究竟你適唔適合學牌買車？


立即做個心理測驗！


如果路試合格，下一步應該點做？
合格後7個工作天你就可以去拎P牌，即係暫准駕駛執照。遵守P牌規矩，一年後無觸犯特定法例就可以拎到正式牌。


如果路試唔合格，排正常期定係快期？
如果肥佬，七個工作天後，你可以選擇排正常期或者「搶快期」（「重考生快期預約服務」）。想穩穩陣陣嘅，就可以重新排個正常期，勝在一報名排期就有確實日子時間，可以及早預備。呢個程序係可以搵人代辦嘅。


點解叫「搶快期」唔係「抽快期」呢？因為真係鬥快喺運輸署嘅網站度搶嘅，並唔係抽籤咁抽。自己搶嘅成功機率一般都頗低，所以唔少人會俾錢快期公司代辦。由於係搶嘅，所以好難講會等幾耐，可以快至一個月，亦可以成年都抽唔到。
只有重考學生可以搶快期，第一次考試並唔能夠搶快期，如果你第一次考試無出席，咁都係當你無考過試。
​​

仲有其他疑問？唔知點做好？
唔好怕醜，即刻撳入呢去留名 👉 http://forms.gle/hSBKhTnthLJFz5Yo7

輝sir或者輝Sir團隊會主動聯絡你，免費解答你學電單車疑難！

如果喜歡我們的文章，請即分享到︰