「覺唔覺得戴住耳機同人講野真係好Ｌ無禮貌？」

某次識左一個新朋友，
同佢都算投緣 興趣，背景都相似，大學入面仲要係同班同學添，
心諗以後上堂都多個人多個照應，
發生咩事走堂交功課都有人幫下手啦。

咁岩順路，
就同埋佢一齊搭車翻屋企，
言談當然就甚歡。

但突然依位同學伸隻手入去個褲袋，
依到摷下個到摷下。
我真係好好奇佢搵緊咩，
唔通想「打哈痴」拎張紙巾？

正當我思考之際，
兄台手一停一頓，
瞬間又如閃電般抽出。

我驟眼一看，
眼見一條一尺如繩細長之物 ，繩之一端又開一叉，
三末皆有黝黑玩意附於其尾。

兄堂將其把玩手上，
頓之將其一尾插落佢部手機到，
手法利落敏捷。
我仔細一睇。

原來係條耳機。


佢順手就拎埋條耳機，
一野就塞住左兩個耳窿。
依個時候我嚇到唔知講咩好，
個下既寧靜引起左戴住耳機既佢注意，
佢一個溫暖既微笑 然後開口同我講
「你繼續得架啦，我聽到wo。」

邊 有 人 同 人 講 緊 野 會 戴 住 耳 機。

依一刻我真係嬲到核爆，
喂師兄，我同你講緊野，
你搵舊野塞住個耳窿係咩意思先？
你有咩咁重要既野要宜加聽阿？
唔係話我有咩有關全球暖化既世紀偉論要發表，
你聽歌睇片上YouTube你自己翻屋企毒埋一邊無所謂，
有咩咁重要要宜加我同你講緊野聽先？

我企穩一吸氣丹田一用力問：
「你覺唔覺得戴住耳機同人講野真係好撚無禮貌？」

講笑啦我邊有咁夠疆，
我忍屎咁忍左佢一程車，
從此我地既生活就好似關節痛既廣告一樣，
你有你既生活我有我既忙碌，
再無交集。

好啦 我都戴個耳機聽翻首陳奕迅既落花流水。
「流水像清得沒帶半顆沙...」