[泰國流浪]香港仔。魚旦流浪記前傳: 搵車篇–2013年1月清邁下集

顯示分享連結
我相信清邁其實同我8字唔多夾…. 有咩理由去幾日都咁多事發生呀!!!

地獄黑仔王PART 1- 出師不利

唔知大家知唔知, 其實清邁係一個古城(深綠色位置)，所以係舊城區出面係有條護城河包圍住個古城。而古城嘅四面都各自有一個城門-GATE!

清邁地圖~~

我同忠哥係個舊城區行左幾日都無咩發現，所以我地決定要去一去遠D既地方向發掘下…

忠哥怕醜，最後一篇，出個背影你地睇下~ 型到呢…

我同忠哥上晝就諗住過揸車去河嘅另一面睇下(地圖嘅右面)! 講得過河，就梗係要過橋啦！因為條河好長，所以有好幾條橋可以行，而我地就行咗最大最多人行嘅個條橋，唸住一定無死啦…

最大最多人行嘅個條橋

點知行行下，見到一班警察截住咗前面嘅人，係個刻，我同忠哥都心知不妙!!!! 但同時.. 我地已經無路可退! 呢個果毛文，我地唯有繼續扮傻向前行，駁佢唔捉我地啦…

當然我哋都唔會走得甩，俾警察截住啦!!!!!!

跟住有個阿蛇過來，佢話我地無戴頭盔同無車牌，(忠哥雖然係個車手，但係邊個話一定有牌㗎，頭盔呢方面就因為租車嘅公家頭盔太dirty同太核突既關係，所以無戴，而我嗰個仲要係粉紅色嘅，點戴呀!!!!!!)

咩原因都好，我當然知係我地唔啱，佢話要罰我地八百銖(頂!甘貴!)，好在之前有泰國朋友已經話左俾我知，泰國啲警察唔係咩好人(你明的!)。佢地因為人工低，要揾外快，你只要俾100-200銖，都可以偷偷地過骨(得啦! 你明的!)。

跟住我就喺褲袋偷偷地拎咗張100銖出來，輕輕地放咗係他手中，他就立即話:「No No No No…」

一般人係呢個毛文，又可能會認為佢係話我唔會收錢，但係我見到佢將手上個100銖揸得好實，我就知咩事啦! 阿蛇!!扮曬嘢，嫌少呀!?!?!?!? 咁無辦法啦! 唯有再係褲袋再攞多100銖出來啦，如是者佢再話:「No No No No…」!

頂佢呀！咁貪心嘅！無辦法，我又再攞多100銖出嚟俾佢(即係TOTAL 300銖囉!!!)，跟住佢就扮到好為難咁話ok ok ，然後放左我地走啦~~~

我地順利過咗條河，行咗成日，都係揾唔到車，無咩發現，個心唸，白白無咗300銖… 點知，返古城嘅時候，我地完全無為意到，我地竟然又行返

同。一。條。橋!!!!!

結果當然又俾人截住啦，今次啲阿蛇當然又想罰我地錢啦，我地就不停話我地今朝已經罰左!!!阿蛇跟住就問我地有無收據。頂….點會有收據呀！我同忠哥又不停用單字英文同阿蛇講我地無收據，對面啲阿蛇無俾我地!!!!

跟住見到阿蛇A同阿蛇B望住對面馬路笑笑口咁講左幾句(設計對白:對面班死仔呀，自己袋袋平安~~哈哈哈哈哈哈哈哈~~)

最後，可能佢良心發現(點會呀…)，跟住就放左我地走啦，唉…..。

地獄黑仔王PART 2 – 又被欺騙

第二日，之前住個間旅館打電話嚟，話有個雙條司機同佢地講，知道有個車房有架我想要嘅車放賣，可以帶我地去睇下，但係話個車房都幾遠，所以要收我300銖來回嘅車費(唉，又係300銖)!!! 聽到咁嘅消息，唔好話300b啦，1000b都俾啦!!!

滿心歡喜咁約咗司機3:30PM喺旅館出發，上車後我地發現，全車後座只有我同忠哥加四條舊車胎(!)。成個車程大約半個鐘，雖然其實唔算好遠，但係呢邊比較起我之前去過嘅地方都荒蕪。

四野無人….唔好帶我地去賣…

去到一個車房，司機落車同車房入面個大叔打招呼，應該係講緊呢兩條香港仔過嚟搵車。我係個車房望來望去，都未見到我想要嘅VW bus , 跟住阿叔就指俾我睇就係前邊嗰部。X你老鼠啊…….五十鈴?

識貨之人都揀三菱啦，俾部五十鈴我！仲扼我300B!!!有無搞錯!!!

如果我識泰文一定同你鬧交，不過呢鑊我講50字粗口你都唔明咖啦!!!!所以今次我就放過你! 唔好再俾我見到你!! 哼!!!

回程返到出去市區，我地周圍行… 反而又俾我地見到一部VW BUS, 等左陣都唔見車主，我地唯有寫紙仔放喺車到，但無回音…




仲見到架靚甲虫~~

之後我地就去行Sunday market，係Market 入面見到橙色象車!!! 嘩! 原來已經有人用緊CHANG VAN 個名!!!好在無用呢個名咋!!! 都係魚旦特別D!!! (唔明可以CLICK: 魚旦篇-點解魚旦仔叫魚旦？)

SUNDAY MARKET! 其實都好多野睇，過開來真係要去去~

佢叫CHANG(音:橙) CAFE...

同場加映: 最後兩日住好D!!! 哈哈哈~~ 忠哥~真係辛苦你啦! (我住好D 都係呢D LEVEL 咖咋~~~~)

300銖一晚，先苦後甜!

就係咁~~整個清邁搵車篇就係咩都搵唔到嘅情況下完結啦~~

************************************************************************************
記得LIKE 埋我FACEBOOK PAGE, 緊貼魚旦同我呢個香港仔嘅流浪之旅~~
https://www.facebook.com/fishballhongkong

如果喜歡我們的文章，請即分享到︰