[中伏味濃] 梵蒂岡的神棍

顯示分享連結


　　去外地旅行，始終都係人生路不熟，總會有過啲中伏經驗。中完伏，一肚氣之後，就梗係要搵人呻下啦。其實都係好事黎嘅，分享中伏經驗，警惕一下其他人，何樂而不為。

　　筆者暑假去左羅馬。去得羅馬，就梗係會去呢個被譽為「歐洲宗教文化中心」、「世界最細國家」嘅 梵蒂岡(Vatican)。偏偏就喺呢個咁神聖嘅地方，筆者就中伏啦。準確啲咁講，應該係差啲中伏。

　　其實整個梵蒂岡嘅景點，主要就係 梵蒂岡博物館(Musel Vatican)同 聖彼得大教堂(Basilica di San Pietro)。出發前，已經做左資料搜集，知道梵蒂岡博物館遊人眾多，排隊買票極需時。為節省時間，我們預先一個月前已經喺官網訂票，印好online ticket，先去出發。於是，筆者有備而戰咁嘅款出發。

近梵蒂岡博物館入口處附近

　　由羅馬市中心出發，可以搭地鐵到梵蒂岡。喺Ottaviano站落車，上到地面，行幾條街就可以去到梵蒂岡博物館嘅入口。喺行緊去梵蒂岡博物館嘅途中，會有好多好似工作人員嘅人，係度指引你。無錯，係「好似」工作人員嘅人。有啲掛住證件嘅「工作人員」，好好心咁走埋黎教你點行，講多兩句，就會介紹啲導賞服務俾你。其實佢地唔係官方工作人員，應該係啲私人公司員工。中伏位，唔係呢度…

疑似工作人員


　　而當筆者同老婆就行到近入口處，見到啲人龍嘅地方，正喺度諗緊邊條隊啱嘅時候。就有個黑人工作人員過黎問我地。我地出示我地張online ticket俾佢睇下。佢就話，張票只能入梵帝岡博物館，入唔到聖彼得大教堂。我地可以每人加多€20 升級張票，仲話有導賞服務。果一刻，佢真係講到似層層咁。而我地就胡裡胡塗信以為真，跟左佢去附近一間office去買票。之後佢收左我地張online ticket，俾左張「VIP」貼紙我地，貼喺身上，叫我地係門口等導遊出發。望住果張貼紙，我開始望唔透，點解張貼紙咁「雞」嘅？再諗真一啲，收左張online ticket，又無俾票，好似好唔妥咁。於是，筆者即刻同職員講要返張online ticket，同唔要佢地所謂嘅升級。咁又估唔到，佢地又好順攤，好快手咁退返€40同張online ticket俾我地。我地如夢初醒咁行返出去條街度，查返啲旅遊書，原來聖彼得大教堂係免費，唔洗買票。即係果個黑人工作人員係擺明想昆我地，好在我地最後可以全身而退，無任何損失。

Online ticket 樣式


　　後記：要去梵蒂岡的話。可於一個月前到官網：http://mv.vatican.va/3_EN/pages/MV_Home.html 預訂門票。門票包括：梵蒂岡博物館及西斯汀禮堂 (Vatican Museums and Sistine Chapel)。離開地鐵站，跟著地圖向入口處走，不需要理會「工作人員」的推廣。另外，由於梵蒂岡博物館藏館豐富，最少花半日時間。而當離開梵蒂岡博物館之後，想到聖彼得大教堂遊覽時，就會發覺排隊進教堂的人龍已經圍繞大半個聖彼得廣場(Piazza San Pietro)。所以筆者建議，梵蒂岡博物館及聖彼得大教堂可以分開兩天遊覽。第二天，再一早於聖彼得大教堂開館前排隊。大教堂是免費的，但要登上圓頂是要收費的 (爬樓梯是€5；爬樓梯加乘升降機是€5)。筆者強烈推介，既然來到聖彼得大教堂，就一定要上圓頂！(有機會的話，下一次就介紹聖彼得大教堂。)

梵蒂岡博物館門票


希望大家開開心心去旅行，唔好再中伏啦！

如果喜歡我們的文章，請即分享到︰