【教育局彈出又彈入】究竟延遲DSE 2020 對今屆考生公平和合理嗎？

教育局一招彈出彈入，突然就將DSE 2020延期到4月尾。可能你會覺得自己嘅計劃被打亂，又或者係擔心到時cutoff嘅分數會高左，仲要辛苦多一個月先完DSE。但係我覺得其實對於大家黎講，教育局今次DSE延期對於都係合理嘅，就係度講一講我自己嘅睇法。

特別鳴謝 @unilifenah 製作後頁嘅時間表

1.肺炎第二波來襲，安全要緊！
有睇新聞嘅同學都知道最近海外居民回歸，武漢肺炎確診數字由每日1-2宗升到每日幾十宗。加上有唔少感染者都係年輕人，如果今個月繼續舉行DSE，尤其係說話，爆發嘅機率係幾何級增長，受苦嘅最終都係大家。相反遲一個月先考DSE，仲有機會搏到疫情舒緩，大家可以係一個安全少少嘅情況考DSE。
2.唔少學校教唔切書，對所有學生公平啲
係停課嘅影響下，學校自己嘅教學計劃都大亂，用Online Lecture上堂嘅效果始終無面對面教書咁好，莫講話每一日上嘅課時少左，就連你上堂都無咁認真，而又好難評估大家上課時嘅表現，變左好多學生要自習。未必間間學校都撥到咁多資源出黎做網上教學或者補課，所以有少學校確實係教唔切書。呢一個月可以話係幫呢啲學唔切DSE Syllabus嘅學生爭取多啲有老師指導嘅時間，比佢可以完成到課業。

而且有唔少中學生手足都因為運動無左幾日甚至幾個月嘅時間，呢一個月都係比佢地一個機會可以追趕番進度。

3.比勤力嘅學生更上一層樓
條curve會高就係一定的，始終全港嘅學生都多左時間溫習但老實說，本身唔讀書嘅學生，比多一個月佢地都唔會讀書，所以佢地唔係你地嘅對手。
而呢一個月正正係比有心機讀書嘅學生有更大機會可以突圍，可能你以為自己已經溫得七七八八，但呢一個月正係可以比你再睇清楚自己溫得未足嘅地方，話唔定就溫中到時DSE出嘅課題。所以各位係呢一段時間一定要頂住現有嘅溫習強度，將自己提升到高於cutoff嘅上升比率

咁點解時間表會縮短同取消Oral？我有少少個人嘅推測：
1.時間表縮短大機會係為左放榜同JUPAS等程序可以如期舉行。要知道其實升學程序嘅時間表係非常緊密。面試、選人、註冊、選科、迎新等活動係一個接住一個黎，之後仲要處理Appeal升分轉科嘅同學！

基本上如果因為DSE延遲而令到放榜延遲，銜接大學方面會面臨非常大嘅壓力！而且其實改卷嘅程序都係用好多時間，要多個marker對卷、呈上分數、核對等等。所以今次DSE壓縮左，都係無可奈何之下嘅決定。

2.說話都好可能係同一個原因，始終無可能將說話再延期。而且說話考試始終係群體活動，有機會以空氣傳播。再加上大家住口罩考，大家唔太聽到大家講野，又好容易衍生對其他考生或者係考官嘅投訴。可能教育局技窮，諗唔到其他更有效嘅方法，只可以被迫取消
我唔係嘗試合理化呢個政府嘅不明智決定，教育局理應一早就要延期。但係面對呢個政府，各位DSE同學真係只可以見步行步。唔好諗「如果無延期嘅話…」，因為DSE時間表變左，各位一定要沉澱一下黎緊呢一個月嘅溫習時間表，唔可以比自己無目標咁溫書。

如果你地覺得好大壓力、好憂心。呢一兩日比啲機會自己休息，唔好諗太多DSE相關嘅事，暫時降低溫書嘅強度。唔好勉強自己，各位同學保重，要撐住。