富東閣：一鴨兩食窮L價

早前晚市禁堂食期間，沙田瀝源邨的酒家「富東閣」，推出外賣片皮鴨，惹來不少人跨區團購，反應出乎意料地熱烈。價錢便宜是其一，同聲同氣是其二，艱難的時刻，要撐，都要撐自己人先，無論路途有幾遠，照撐。
今年中秋做節，再訪瀝源廣場的平台，上次是來飲茶，今次吃小菜，晚上七點，整個大廳差不多滿座，當很多酒家紛紛轉行C區，這裡仍維持4人一枱。


平日叫鴨，＄178一隻，另外加＄30，可以來個兩食。

屋邨酒家的格局，當然不會容許有個師傅，在食客面前拿起隻烤鴨即席片皮，一碟連鴨肉的鴨皮，眼見份量夠三個人分，鴨皮尚脆但不夠熱，鴨肉有點乾，用餅皮包著，再加些甜醬、青瓜、京蔥，總算收復一點失地。
賣得這個價錢，不奢望是好食到感動級數，若想吃好一點，坐多兩個站到「沙田18」吧。

醬爆鴨件，入口熱辣辣，頗為惹味但純粹吮骨，佐酒佳品但當晚我只飲茶。

＄98有6隻椒鹽鮑魚，鹹香的外表，裡面的鮑魚肉質彈牙，味道亦鮮，以質素來計是便宜到極點。
冰鎮咕嚕肉，用筷子夾起有一點拔絲的效果，但這不太重要，於冷傲的姿態之下，恰好的酸甜度，完全包圍著酥脆鬆化的豬肉，在這般酒家吃到如此水準的咕嚕肉，也是一個驚喜位。
見到隔離枱的波士頓龍蝦伊麵，憶起剛出來做事的日子，正值90年代中期，龍蝦開始普及化，不時與朋友到連鎖酒樓，上湯／芝士龍蝦伊麵是不可或缺之物，幾個人夾份，所費無幾。
臨走前去一去洗手間，經過地庫的廂房，有不少是年青人坐埋一枱，此情此景，好像看回廿多年前的自己。

四道菜，三個人剛好應付，埋單連加一不用＄600，值得再來晚飯，但應該不會再吃片皮鴨了。
現時的疫苗氣泡下，難以回復以往連開幾圍的熱鬧，否則在此搞個窮L飯局，一定很過癮。富東閣：沙田瀝源街6號瀝源廣場1樓5號舖
請不忘讚好我的專頁：https://www.facebook.com/foodiesmashingpumpkins