尚青商號：禁令前壓線

晚市禁堂食的第一天，五時一刻來到灣仔「尚青商號」，坐下不久，有位隸屬某電台的記者走過來，訪問我兩句。「點解你會喺呢段時間嚟呢度嘅？」我沒有記低記者所問的逐一隻字，意思大約是這樣。
「食埋晚飯先返屋企。」我表面就這樣答，心裡面就。。
「X！你估我想咁早食晚飯㗎？」
「點解你會揀呢度嘅？」記者再問。
「因為我咁啱喺呢頭。」我大約的答案。

真相是，當日我在中環試酒，完場之後乘搭電車到灣仔，吃個early dinner才回家，頭號目標是「新景園」，去到門口見到已經拉閘，才想起它們平時在下午時間休息。
行過去隔離喜帖街，經過「永華日常」，有朋友批評過其雲吞麵不復當年勇，反而其它出品的水準有驚喜，但是見到門外有不少人等候，隨即打消念頭；同一條街其它食店，不多談啦。
頓時想起，上年差不多時候，某日中午去到「尚青商號」門口，大排長龍，結果掉頭去了君悅咖啡廳，吃碗魚湯米線。
時間好像過得又幾快，突然又已一年，疫情仍持續，依然不能飛，長此下去，遲早抑鬱。
今次直行直入，我問店員：「你們last order未？」
店員：「未呀？你一位？」
見到有枱，隨便坐。
時間無多，即刻用電話scan QR code落單，一個人無懸念食碗麵，只是要全肉或半肉半筋。
貪心的我，當然選擇後者。

等候期間，店員送上一杯凍冬瓜茶，似乎是要我等得久一點而道歉，其實也只是十多分鐘而已。

紅燒半筋半肉麵，先試湯底，辣度輕微，人人都接受得來，濃郁醇厚，還有一點回甘，層次感豐，並非平鋪直敍般單調。

牛肉鬆軟不硬，牛筋爽滑，與及闊身的麵條，三者皆盡情吸收湯底的濃厚。


另外的三小碟，酸菜是吃牛肉麵不可或缺之物，若可以任添的話就最好不過；雲耳純粹過口癮，油條當然是浸著湯來吃。

一舉而盡，抹抹咀，看腕錶上的時間，還有五分鐘便到法定關門時間，即刻起身埋單，只收現金。


「程班長」將會在兩個月後結業，到時想吃一碗台灣牛肉麵的話，這裡將會取代前者，成為我的首選。

當然是在香港。

尚青商號：灣仔蘭杜街4號文熙大廈地鋪

請不忘讚好我的專頁：https://www.facebook.com/foodiesmashingpumpkins