Android 足球遊戲大比拼：FIFA Mobile vs Dream League Soccer
依家啲手機、平板嘅性能咁勁，可能各位沉迷足球game嘅球迷都心思思想搵返隻適合喺手機、平板上面玩嘅足球game，但係單以android嚟講都已經有好多足球遊戲，質素當然係參差不齊，今次小編就用android平板，揀咗兩隻比較受歡迎嘅足球game，嚟個大比拼，分別係大廠出品嘅《FIFA Mobile》，同埋口碑甚佳嘅《Dream League Soccer》，睇下玩邊隻好啦！
遊戲系統
《FIFA》系列作為現時足球電子遊戲嘅霸主，單係個名已經可以吸引唔少玩家，其中「Ultimate Team」模式喺家用機上仲掀起狂熱。《FIFA Mobile》係一隻手機game，自然唔可能包含晒《FIFA》家用機版本嘅所有功能，所以就選擇咗專注喺類似「Ultimate Team」嘅 玩法上。
《FIFA Mobile》就好似「Ultimate Team」模式咁，玩家一開始只有一啲實力麻麻嘅球員喺手，需要慢慢透過贏得比賽，儲錢抽卡，去砌出自己心目中嘅最強陣容。當然，大家都可以選擇直接課金抽卡啦，但一步一步儲遊戲幣砌隊，成功感仲大，分分鐘「中毒」上癮。
（《FIFA Mobile》起手隊伍真係好渣，相信係令人課金嘅原因之一。）
（玩過「Ultimate Team」都知抽卡好易上癮。）
《Dream League Soccer》方面，佢嘅系統同《FIFA Mobile》都係大同小異，不過《Dream League Soccer》冇抽卡系統，球員係喺「Transfer Market」入面直接一個一個咁買，亦可以買一個「Secret Player」變相抽人，而《FIFA Mobile》抽卡就一pack一pack咁抽，中伏機會都幾高，當然抽卡嘅刺激同驚喜（抽到好嘢就驚喜）又係另一種享受啦。
（《Dream League Soccer》似乎更有良心，起手隊有得揀一個球星坐陣。）
（就算早期想買多個球星幫手都唔難。）
另外，《FIFA Mobile》都係好似「Ultimate Team」咁，可以喺「Transfer Market」拍賣啲球員嘅。
（《FIFA Mobile》啲球員都幾貴……）
操作
《FIFA Mobile》嘅操作模式有兩個選擇，主要都係標準嘅「三鍵控制」同埋「一鍵控制」，其中「一鍵控制」就淨係得方向同加速掣，傳波就直接喺screen上面篤傳波對象或者位置，射波就用手指拉方向同力度，都幾方便易用；但pro啲嘅玩家相信都會揀返標準嘅「三鍵控制」，操作模式比較接近家用機版本，仲同時保留touch screen傳波射波。
《Dream League Soccer》就淨係得「三鍵控制」嘅方式，分別控制射門、長傳同短傳，但就冇得用touch screen直接揀傳波位置同射波，喺手機/平板上面得三個掣，操控唔夠精準，想放個靚直線就難少少囉 （因為少咗個直線掣，又冇得用手拉線）。不過，可能小編用唔慣，加上開頭球員能力值普遍較低，覺得《FIFA Mobile》嘅己隊防守唔多好，反而《Dream League Soccer》防守容易啲，好似AI有少少幫手（起手隊都不至於好似FIFA咁渣）。
畫面及音效
畫面同音響都係唔少玩家關心嘅問題，老實講玩得手機/平板game都預咗畫質比家用機版係差啲。今次小編專登用擁有9.7寸芒嘅Samsung Galaxy Tab S3去試game，喺大芒之下，兩隻game嘅gameplay畫質都幾粗糙，球員個樣都睇唔清楚，反而塊草皮就唔錯（笑）。不過，喺比賽之外，《FIFA Mobile》有球員真實肖像嘅授權，而《Dream League Soccer》就只得頗為神似嘅電腦樣。
（兩者嘅畫質都唔多好，大廠出品嘅《FIFA Mobile》[上] 勉強叫做細緻啲。）
音效嚟講，足球遊戲嘅現場音效同評述都係重要嘅細節。今次就要投一票俾《Dream League Soccer》喇，除咗有節奏感嘅背景歌曲之外，仲有比賽入面嘅現場音效同埋真人評述。咁啱試game呢部Galaxy Tab S3就係首部配備四個揚聲器同埋經過AKG專業調音嘅tablet，《Dream League Soccer》就充分發揮到部機嘅立體聲性能，臨場感一流。至於《FIFA Mobile》，就令人失望喇，現場音效就有喇，但氣氛唔夠，致命傷係身為一隻足球game竟然連講波都冇，嘥咗部機咁靚嘅音響呀。
後記
通常用平板電腦打機都會擔心太重，會攰同埋唔方便操作嘅問題，今次試game用呢部Samsung Galaxy Tab S3完全冇呢個煩惱，佢有9.7寸極高對比度嘅Super AMOLED超高清屏幕，同時WIFI板重量只係得429克，拎住嚟打機都唔會攰。
另外，Galaxy Tab S3 除咗有靚芒靚聲，仲有專門為打機而設嘅「Game Launcher」，可以鎖定返回鍵，唔會再唔小心彈咗出首頁，仲可以幫你cap圖錄片，加埋「禁止打擾」功能，唔使俾啲message搞到輸波！
講返兩者game，總結起嚟，兩隻game嘅畫面、系統、操作都差唔多，但《Dream League Soccer》起手隊唔會渣到離晒譜、買球員都唔貴、音效比較立體，如果係想追求輕鬆打下機嘅球迷應該會幾適合。《FIFA Mobile》就擺明想你課金，似乎比較適合啲hardcore少少嘅玩家，操作可以精準啲，但啲球員咁貴，要花多啲時間煲先至得喇。
測試用機：Samsung Galaxy Tab S3 (LTE 版: $5,598 / WiFi 版: $4,998)