阿根廷隊醫同曼城唔夾口供：阿古路要唞六周，依家郁唔到好鬼躁

上星期，曼城前鋒阿古路喺荷蘭遇到車禍，導致肋骨骨裂，當時的初步消息認為佢可能要休息6至8個星期。事後，曼城方面表示，阿古路休息2至4星期就可以復出，但最新消息係阿根廷隊醫探望完佢之後，認為佢傷得比預期嚴重，要唞6個星期先得。
喺當地時間上星期四晚，阿古路去咗荷蘭睇哥倫比亞歌手Maluma嘅演唱會，睇完之後搭的士去機場，準備返英國，點知架的士失控撞落燈柱，不幸中之大幸，阿古路冇嚴重受傷，但就有肋骨骨裂，都要休養一段時間。


曼城派隊醫睇過阿古路之後，話佢休息2至4星期就可以復出，最快仲有機會喺國際賽期之後對史篤城上陣添！之但係，阿根廷隊醫維蘭尼（Donato Villani）最近睇完佢之後就唔係咁講喇。
維蘭尼話：「佢依家心情超差，佢好想好啲好返，幫國家隊踢波。」

「佢覺得唔開心，因為佢好想同我哋一齊。今次意外唔係佢嘅錯，但係就令佢缺席我哋國家隊嚟緊兩場世界盃外圍賽。」

「佢嚟緊一個半月都唔可以踢波。佢喺屋企入面都唔可以周圍走，更加唔可以上落車。我見到佢嘅心情真係好差。」

今次阿古路受傷認真大鑊，喺球會方面，佢狀態大勇，近8場入咗7球，入多一球就可以追平曼城名宿布魯克（Eric Brook）嘅177球隊史紀錄，球隊嚟緊幾個星期仲要對阿仙奴同埋踢歐聯。

國家隊方面，阿根廷喺2018世界盃南美洲區外圍賽只係排第5位，但只有前4位可以直接晉身決賽周，如果對完秘魯同厄瓜多爾之後都仲係排第5位，就要踢附加賽。阿古路肯定會缺陣今圈最後兩場比賽，雖則阿古路喺今屆外圍賽未開齋，但如果喺國家隊最重要嘅比賽因傷缺陣，仲要萬一睇住球隊出局嘅話，對阿古路嚟講都係一種遺憾。


Source: DailyMail、SkySports