高普：警告沙拿唔好再插水

周日英超比賽，利物浦作客車路士，以0-1敗陣。不少領隊被問到麾下球員是否插水時，都會表示唔清楚、「我唔會答啲咁無聊嘅問題」，甚至為球員辯護。利物浦領隊高普就與別不同，佢喺賽後愛之深責之切，警告沙拿唔好再插水。


「PFA足球先生」沙拿今季表現十分出色，不過喺今仗受到車路士後防魯迪加等人嚴密防守，連續三場聯賽未能入球，打破英超單季入球紀錄嘅日子一再推遲。喺上半場，急於爭取入波嘅沙拿，因為喺疑似同加利卡希爾接觸之下倒地，被球證判罰插水領黃牌。

https://i.imgur.com/SiixHYf.gif

高普喺賽後直言，認為沙拿唔應該插水：「冇錯，我認為嗰球佢係插水，係咪先？
又或者佢係喺度等人踢佢，我都唔知，總之我唔想見到佢咁樣做，呢樣唔係佢會想做嘅嘢，但好明顯就係發生咗。

喺其他情況，佢都經常被人踢而得唔到犯規，咁都係唔應該，不過事情總係咁，佢需要面對呢個情況。」


「佢需要踢得更好，佢可以踢好啲同埋再入波，呢樣嘢係毫無疑問。佢今日喺場上冇得到任何空間，佢係可以喺冇空間嘅情況之下有好表現，但偏偏今日就係唔得，其他一切都做得好。」


Source: Independent、Guardian