洛里斯涉酒後駕駛被捕，今輪鬥曼聯、出庭四日後戰紅軍

根據《BBC》及《Sky Sports》等傳媒報導，熱刺兼法國隊長洛里斯因為酒後駕駛被捕，暫時獲准保釋等候出庭。

報導指，於英國時間8月24日凌晨02:20，熱刺門將洛里斯駕駛汽車途經倫敦市中部 Gloucester Place 時，被警方例行截查，經測試違反酒精標準，被捕並獲准保釋。洛里斯須於9月11日到法庭應訊。

現時係香港時間8月24日22:45，有關新聞正正喺主帥普捷天奴召開例行記者會後先得到報導，因此無法得知熱刺會方如何處理，落筆時熱刺官方暫時未作出任何回應，雖然官方Twitter不斷有新post出現，但無一涉及洛里斯。

不過，熱刺今輪比賽將會作客曼聯，而洛里斯喺9月11日出庭後四日，即9月15日就要面對利物浦，賽前出現呢單新聞勢必會影響軍心及備戰，洛里斯作為球會及國家隊雙料隊長，有咁嘅行為無疑係令人失望，球會應該向佢作出紀律處分。