【執得包袱】富咸前鋒卡馬拉涉打球會保安被捕，從此禁入訓練場

英超升班馬富咸季前轉會投入近一億英鎊，但現時護級形勢不容樂觀，球隊問題多多，到底老帥雲尼亞里有冇辦法起死回生，仍然係未知之數。不過，富咸前鋒阿布巴卡卡馬拉 (Aboubakar Kamara) 就極大機會可以宣布「冇得救」。
根據《Sky Sports》報導，富咸前鋒阿布巴卡卡馬拉因為喺富咸訓練場涉嫌傷害他人身體及惡意破壞，而被警方拘捕。據悉，呢位23歲前鋒屢次與隊友阿歷山大米祖域發生爭執，包括早前一次瑜珈課中大打出手，最終導致領隊雲尼亞里認為佢有紀律問題及不尊重球會，決定將佢貶到U23梯隊，有傳會喺今個轉會窗內將佢掛牌出售。卡馬拉被貶後並未收斂，報導指出佢喺周一U23梯隊訓練時遲到，到達時得知自己被球會罰款，十分不滿，要求向球會高層投訴。

保安到場協助調停，卡馬拉涉嫌襲擊保安，因此球會報警求助，警方證實於星期一下午拘捕一名20多歲男子，指佢涉嫌傷害他人身體及惡意破壞，將佢帶返警署調查。富咸會方發表聲明，感謝警方行動迅速，又指「涉案人」將會被無限期禁止進入訓練場及出席一切球會活動。


法國籍前鋒卡馬拉於2017年夏天加盟當時仍喺英冠嘅富咸，今季為球隊上陣13場英超賽事，射入3球。早前，卡馬拉因為喺比賽中搶射12碼並射失，被主帥雲尼亞里狠批。相信卡馬拉喺富咸嘅前途已經劃上句號，有傳佢可能喺今個轉會窗內登陸土超。

Source: Sky Sports、Guardian