【再執二攤】恩沙基被炒換米赫洛域，博洛尼亞開季至今僅兩勝護級勢危

球季下半季已經展開，唔少球隊趁機檢討上半季戰績，護級球隊亦必須搵出問題所在，趁早求變，否則連垂死掙扎嘅機會都未必有。意甲博洛尼亞今季戰績極差，全歐洲五大聯賽所有球隊中，只有7支球隊至今勝仗少於3場，而意甲排尾三嘅博洛尼亞正係喺呢7支球隊之中，主帥恩沙基 (Filippo Inzaghi) 被炒在所難免，巧合在於接替恩沙基位置嘅再一次係米赫洛域 (Sinisa Mihajlovic) 。

上述歐洲五大聯賽7支至今勝仗少於3場嘅球隊當中，意甲聯賽榜最尾三隊全數在列，21仗取得2勝嘅博洛尼亞的確唔夠只得1勝嘅基爾禾差，皆因基爾禾係歐洲五大聯賽中唯一只取得一勝嘅球隊，所得聯賽積分8分亦係最差分數，而博洛尼亞喺分數上未至於護級機會渺茫，佢哋暫時取得14分，同第14位嘅卡利亞里亦只差7分。不過，為確保護級形勢，球會的確需要及早「止蝕」。

根據《BBC》報導，博洛尼亞宣布解僱主帥恩沙基。呢位45歲意大利名宿喺2018年6月起出任博洛尼亞主帥，但球隊開季至今，21仗只取得2勝8和11負，以14分排意甲第18位。好多人以為前鋒出身嘅教練唔識教防守，但數字上，恩沙基帶領嘅博洛尼亞表現就係另一回事，佢哋共攻入16球、失34球，失球方面其實已經相當接近一般中下游球隊，反而入球數字比包尾嘅基爾禾仲少一球，同費辛隆尼齊齊墊底。

https://i.imgur.com/UWdrm2X.gif(數字上博洛尼亞失球數字唔算太可怕，但呢一球就反智得不可思議)

報導指，博洛尼亞班主沙普圖 (Joey Saputo) 喺球隊最近以0-4不敵護級直接競爭對手費辛隆尼後，以「可悲」形容球隊表現，而呢場「6分波」慘敗亦成為恩沙基嘅催命符。不過，球會仍然喺聲明中稱讚恩沙基工作態度專業及有熱誠，好來好去。


博洛尼亞選擇嘅繼任人選係「罰球王」米赫洛域。前南斯拉夫國腳米赫洛域現年49歲，佢2008-09球季已經執教過博洛尼亞，當季係米赫洛域首次出任主帥，帶領博洛尼亞僅僅以第17位護級成功。另外，米赫洛域同樣曾經喺2015年接替恩沙基，成為AC米蘭主帥，兩人可以話係另類嘅「再續前緣」。值得一提嘅係，米赫洛域上一份工作係喺2018年夏天上任成為葡超球隊士砵亭主帥，但9日內就因與管理層理念不合而被炒。


一齊睇下博洛尼亞上仗表現：
https://youtu.be/Z0wKJ2-ONj8
Source: BBC