【「樂極生悲」】摩洛哥球隊入波全隊自拍忘形慶祝，對手極速開波追平

「桂神」話齋：「一日未完場，都唔好慶祝住，It's not over, till it's over」無論你係踢緊波，定係玩緊百萬富翁，「拍定手先」，通常都伴隨未如理想嘅結果。喺球場上，有啲球員一入波就會興奮到忘形，除咗有機會因為用不當行為慶祝而領牌之外，仲有可能因為唔集中而迅速被追平，功虧一簣。

最近一場摩洛哥頂級聯賽，尤索菲亞 (Youssoufia Berrechid) 對莫羅迪亞 (Mouloudia Oujda) ，尤索菲亞一班球員學埋「巴神」巴洛迪利早排嘅自拍慶祝，結果就出事囉。

https://i.imgur.com/KGctdoe.gifhttps://i.imgur.com/MNMXulv.gif

當時係比賽29分鐘，尤索菲亞嘅7號仔喺禁區邊緣一「吸」一射入網，馬上衝向場邊慶祝，而且全隊波「上下一心」一齊去場邊自拍，點知搞得太耐，球證示意對手可以開波。莫羅迪亞一班球員真係如入無人之境，推到入禁區，尤索菲亞球員回防心切，結果犯規輸12碼，極速被追平，呢場波最終比數亦係1-1。

https://i.imgur.com/1leLYth.gif
有球迷睇完片段之後，就指出尤索菲亞只要將一位球員留喺對方半場內，就可以避免今次事件。事實上，尤索菲亞今次係犯下雙重錯誤，第一重當然係樂極忘形，第二重就係即使大部分隊員到場邊慶祝，亦應該留低一人喺對手半場內，不過睇返片段，雖然的確有一位尤索菲亞球員 (除門將外) 冇去場邊慶祝，但佢不幸地並唔知道自己要扮演嘅角色，喺隊友未返到球場前，佢已經慢慢返回自己半場，而球證正係喺佢踏過中場線一刻示意開波，可見呢一位尤索菲亞球員冇去慶祝，並唔係事先溝通或有意識阻止快開嘅舉動，但當然責任係喺慶祝嘅人身上。

完整片段
https://www.youtube.com/watch?v=UV6sEHsrl9Q
所謂留喺對手半場係指，根據球例有關中圈開波嘅規則訂明，除咗第一腳開波嗰位球員之外，雙方所有球員必須喺己方半場範圍內。因此，如果有一位球員喺對方半場內，就唔構成「雙方所有球員必須喺己方半場範圍內」嘅條件，就唔可以開波住，當然如果有球員故意以此拖延開波時間，係可以被黃牌警告，但就可以換嚟全隊得到返回位置嘅時間。有球迷舉例，喺2018世界盃上，有一次英格蘭入波慶祝時，後衛查比亞就刻意留喺對方半場。