〔歐聯短評 : 巴黎聖日耳門 2-0 曼城〕曼城難以長時間壓制巴黎 巴黎大敵當前下團結作戰 贏體能同把握力

歐聯A組大戰，巴黎聖日耳門主場以2-0擊敗曼城。巴黎獲得今屆歐聯首場勝利，美斯攻入加盟巴黎嘅第一球，兩者都如釋重負。
比賽早段節奏偏慢，兩隊未有強烈壓迫，主要都係將隊形集中於中場，互相控球在腳，尋找機會。

🗼⛵MNM組合嘅回防幅度明顯增加令防守優於曼城

對比上場歐聯對戰布魯日，巴黎今場面對曼城，MNM組合嘅回防幅度明顯增加，尤其今場可見尼馬多次參與球隊442/532防守隊形中嘅中線部分 (防中位置)。而曼城方面，其中場人員迪布尼同貝拿度施華偏向進攻型，只有洛迪一位防守中場，防守力相比巴黎稍有輸蝕，換言之巴黎進攻嘅難度相對低。第8分鐘，巴黎一次右路攻勢，基耶打開記錄。

⛵曼城進攻應對方法見效

普捷天奴今場安排巴黎防守隊形集中於中路，整體効果唔錯。不過，曼城控球之下，以兩邊拉扯打法應對亦曾製造威脅，皮球從右路快速轉移至左路基亞利殊，回俾偏左禁區頂嘅迪布尼挑傳製造史達寧同貝拿度施華連續兩次中楣嘅攻門。
⛵🗼曼城受體能劣勢限制令巴黎有反擊空間

曼城上場同車路士嘅大戰，消耗唔少體能，相比之下巴黎上場面對蒙彼利埃較為輕鬆，今場嘅體能更充足。體能處於劣勢嘅曼城，難以長時間壓制巴黎，以主攻姿態控球在腳。

30分鐘左右開始，落後嘅曼城加強壓迫力度，巴黎隨之更多收縮，但曼城嘅壓迫漸漸隨體能下降，巴黎控球同反擊機會越來越多，37分鐘，麥巴比反擊推進橫傳，靴里拉射門威脅甚大。下半場亦有相似「劇本」，曼城增加壓迫之下隨體能下降，暴露空間讓巴黎控球以及打反擊。73分鐘，曼城中場線同後防線之間暴露大量空位，巴黎反擊攻勢中，美斯從右路推入禁區頂，同麥巴比「撞牆」後入波，拉開比數。

哥迪奧拿除換入兩位進攻球員(科頓入替基亞利殊、捷西斯入替史達寧)，或者可以考慮以費蘭甸奴入替中場洛迪，補充中場壓迫嘅掃蕩力。

⛵🗼巴黎未算技術性擊倒，但贏體能同把握力

雖則曼城未能長時間壓制巴黎，不過，球隊今場亦製造了唔少攻門，但被神勇嘅巴黎門將當拿隆馬一一化解，未能把握機會，導致未能入球。巴黎今場勝利未算技術性擊倒曼城，但體現了把握力以及體能嘅重要性。
🗼團結至勝

巴黎今場面對同組大敵曼城，球隊明顯更加團結，如尼馬多次回防，美斯同麥巴比配合入球，美斯「瞓身」人牆後防守罰球以身作則，麥巴比其後亦有「瞓身」防守罰球。以上都係今場巴黎勝出嘅重要元素，希望隊中嘅球星們繼續好好合作，擦出火花，令球隊表現如陣容般夢幻。