〔英超: 利物浦 2-2 曼城 比賽描述評論〕哥迪奧拿部署令曼城上半場佔據優勢 下半場利物浦積極壓迫搶攻 埃及之王發威造就經典入球

英超榜首大戰，利物浦於晏菲路球場同曼城合演精彩一戰，最終兩隊以2-2握手言和。
🔴阿諾難以替代，利物浦右路難免減弱

今場利物浦右閘阿諾因傷缺陣，由老將占士米拿頂上，球隊右路攻防難免減弱。

比賽早段，利記更多壓前，曼城主要收縮防守。面對曼城嘅密集防守，利記主要於右路進攻，其組織主要由沙拿、軒達臣同占士米拿負責。米拿嘅經驗有助球隊組織，但其速度始終有限，帶來衝擊力同進攻變化較阿諾少，面對曼城穩定嘅防線，未能帶來太大威脅。

🔴盡量減少被針對攻擊

上半場中段開始，利記開始減少壓迫，或許高普認為上半場曼城體能較多而反擊力較強之時，球隊要避免暴露身後空間俾對方打快攻/反擊，針對米拿嘅速度問題。

另外，若果利記上半場就一直維持前場壓迫，比賽節奏會維持快速，雙方體能會隨之消耗得更快，令下半場中段開始，比賽節奏減慢。到時互相控球主攻之下，利記只能同曼城比拼對方主攻陣地戰嘅強項。高普亦可能因此選擇到下半場先增加前場壓迫。
⛵仍能製造機會

哥迪奧拿部署令球隊上半場佔據優勢。球隊多次於偏右位置猜傳，牽引利記後防，製造左路空間，再轉移俾左路年輕而速度快嘅科頓同基亞利殊針對米拿。加上左閘簡些路幫助組織，即使利記減少前場壓迫，更多壓縮後防線身後空間，哥帥嘅針對性部署依然能製造機會。其中包括於陣地戰中左路輸送俾迪布尼兩次插入禁區嘅攻門，以及兩次偶有嘅反擊中有貝拿度施華偏右位置連過四關，以及門將艾達臣精準長傳分別為科頓製造半單刀機會。
🔴積極搶攻扭轉形勢

下半場，利記積極壓迫搶攻，利用了上場歐聯大勝提早換人所積累嘅體能優勢，成功扭轉形勢。曼城上一場苦戰PSG，體能上相對輸蝕，壓迫嘅效能相對較低，利記後場傳送越過曼城前場壓迫到沙拿腳下，沙拿推過簡些路再長驅直進至禁區頂，牽引拿樸迪上前補位，然後放直線俾插入其空洞嘅文尼射入領先一球。
🔴埃及之王發威

利記第二個入球，屬「埃及之王」沙拿發威嘅成果，沙拿於右路先以背身對抗簡些路，再變速突破包夾，推入禁區面對拿樸迪，用腳背輕推假裝內切，再以腳內檔扭向底線，然後於窄位以非慣用嘅右腳射遠柱中內柱彈入。沙拿今個入球嘅技術成分同其觀賞性同樣出色，可謂經典。
⛵🔴曼城更簡單直接攻擊利記弱點

曼城下半場早段受壓之後，決定減少控球，以更簡單方法進攻利記弱點。69分鐘，獲加插前牽引羅拔臣，捷西斯快速推進入中路再傳球俾左邊嘅科頓以速度針對米拿射入扳平一球。

第二次扳平嘅入波，迪布尼直接長傳至左邊嘅科頓，入替米拿嘅高美斯速度足夠，但未能阻止科頓傳中，皮球折射到禁區頂嘅迪布尼腳下，迪布尼射中省中馬迪普彈入。
🔴⛵每下都係關鍵

比賽過後，有人話: 「如果唔係沙拿發威，利記邊會有波入？」，亦都有人話: 「如果唔係法賓奴空門失機，利記已經贏咗。」。只可以話高手過招，每一刻，每個細節都係關鍵。
今場戰術上，兩隊都展現到優良嘅執行能力，令比賽難分高下。而球員嘅發揮包括施華同捷西斯嘅盤扭突破、艾利臣兩次半單刀撲救、艾達臣精準長傳、沙拿發威、洛迪伸出長腿護空門...... 等等嘅畫面，令比賽格外精彩。