〔英超短評 : 熱刺 0-3 曼聯〕蘇帥重拾三中堅陣令曼聯贏在防守 熱刺兩次失誤導致大敗

本周英超大戰，熱刺同曼聯兩隊近況不佳嘅球隊對決，最終作客嘅曼聯淨勝三球。
今場兩隊進攻火力一般。曼聯前線C朗、卡雲尼同般奴嘅組合，個人能力毋庸置疑，但組合嘅整體速度一般，主攻等地戰之時沒有拉邊角色。

而熱刺前線嘅組合哈里簡尼、老孫、盧卡斯速度較快，但大多數主攻等地戰之時，只有老孫拉邊，面對對方三中堅陣，難有太大效果，球隊好多時只能靠勉強嘅高波打入禁區，被麥佳亞、華拉尼同連達路夫嘅三中堅組合化解。

防守方面，蘇斯克查終於重拾三中堅陣，以防反取態迎戰，令中後場人數足以形成覆蓋範圍大而且緊密嘅防守，以抗衡熱刺同抵擋對方進攻。以防守取得球權後，便能給予前場三人足夠嘅發揮機會，從中造就C朗嘅窩利，前線三人嘅配合反擊，再加一次反擊入波，曼聯今場取得了三個入球。

熱刺領隊紐奴所安排嘅陣型同人選，能力分佈較平均，加上擁有進攻中場能力嘅盧施素在陣，球隊進攻火力理應較強。不過，主攻陣地戰之中未有兩翼拉邊時，其進攻火力被曼聯嘅三中堅陣抵消，今球隊擁有58.2%控球比率下，射門仍少於對手。球隊自身中堅人數較少之下，防守力不及曼聯，最終被C朗屈機一次，自身防守兩次包了越位導致兩個失球，造成了落敗三球嘅結局。
今場曼聯淨勝三球，比數看似表示其攻擊火力強大，但其實球隊贏嘅，首先係防守，從而再俾進攻球員發揮嘅機會，蘇帥重拾三中堅陣係當中嘅一大關鍵。下輪英超面對近期連敗嘅曼城，曼聯絕對有機會再成對方嘅「剋星」，蘇帥或從而再次消除下台危機。

而熱刺方面，球隊延續了近期頹勢，今場中後段落後時，球迷噓聲不絕。未來嘅賽程中，熱刺未來一個半月嘅賽程沒有大戰，希望紐奴及其團隊能把握機會帶領球隊成績反彈，否則恐怕難逃下台命運。