英超快車丨疫情有如具傳染力嘅傷兵潮

近期，英國疫情再度爆發，英超各隊都有職球員確診，部分比賽需要延期。就疫情加劇，英超20隊於周一進行了會議，最終決定繼續進行聖誕快車賽期。
以下係有關嘅討論:

💡為何冒險？
最終決定繼續進行比賽，或考慮到聖誕快車期間停賽帶來嘅經濟損失，押後比賽帶來嘅工作負擔如退票手續、訓練安排等相當繁重，加上擔心停賽變相提早偈冬期而打亂作戰計劃，令各隊最終決定冒險，繼續比賽。

💡各隊難有良好發揮
疫情爆發對球員健康構成威脅，唔止係感染病毒，仲有一連串嘅影響。當陣中有人確診，就有如具傳染力嘅傷兵潮，令各隊陣容天殘地缺。而康復/傷癒嘅球員，便需要匆匆復出。情況如車路士領隊杜曹提到對陣狼隊時，剛剛康復一日嘅高華錫需要上陣半個鐘，傷癒嘅簡迪同查洛巴操練不足便要上陣。球員匆匆復出，好可能造成狀態不穩甚至再次受傷嘅情況。若上述情況持續，恐怕各隊難有良好發揮，英超比賽嘅水平難免下滑。
💡板凳深度
疫情提高了球員傷病缺陣嘅機會，令聖誕賽程更加考驗各隊嘅板凳深度。

💡青年軍嘅機會
然而，英超賽會提到，聖誕快車比賽如期舉行，若球隊人數不足，須以青年軍頂上。呢段時期，各青年軍或有更多吸收經驗同展示實力嘅機會。

💡重新審視
兩周之後，即係聖誕同新年快車之後，英超比賽安排將重新審視。若疫情加劇，暫停比賽應該無可避免，但此舉只有減緩嘅作用，到比賽重開時，疫情好可能再度爆發。從保護球員嘅角度，閉門作賽會更加穩陣。