英超: 車路士 2-0 熱刺 賽後文章丨車路士左右拉扯造就世界波 熱刺重兵布防似乎「過重」

顯示分享連結
週日，英超上演倫敦打吡，車路士主場兩球淨勝熱刺，今季第四次擊敗對手。
🦁🐔體能狀態
上周中杜曹決定讓球員放假兩日令球隊狀態回升，相比熱刺力戰反勝李斯特城後少一日休息調整時間，兼且今場作客史丹福橋球場，車仔有一定體能優勢。因此今場車仔會主動搶攻力求贏波反彈，而熱刺以保守取態應戰。

雙方陣容:

🦁右路三人組
車路士領隊杜曹安排球隊以433應戰。面對以防反取態應戰嘅熱剌，車仔大部份時間處於主攻陣地戰，球隊上半場多數攻勢來自右路嘅組織。施耶治、曼治同艾斯派古達三人配合流暢。施耶治主要從右路內切，曼治主要Overlap 拉右邊，幫助拉出空間，而艾斯派古達主要從後輔助，幫手駁腳之餘亦會前插。

🐔「四閘陣」重兵布防
熱刺領隊干地，今仗以重兵布防，442陣型當中，兩邊各有「兩閘」，左右中場嘅人選薛施隆同杜靴迪本身都係閘位／翼衛球員。兩人分別看管對方嘅中場（杜靴迪對高華錫、薛施隆對曼治），由於曼治常拉右邊而高華錫留喺中/中前場，所以大家有時會見到薛斯隆退至右閘位置而杜靴迪變成防中，令隊型變成三中堅532陣型。熱刺防守相當緊密，車路士難以滲入禁區，只能靠偶爾嘅快攻同高波侵襲熱剌陣地。
🐔火力有限
上半場車路士未能攻破熱刺，而熱刺重兵布防之下，只有兩個前線球員，哈利簡尼同比亞芬。哈里簡尼本身速度一般，亦經常要回後幫手，而左右中場薛施隆同杜靴迪因球隊受壓而需要回到中/中後場，難以經常參與反擊，熱刺反擊火力有限。上半場尾段難得嘅一次反擊，薛施隆左路推進傳入禁區，哈里簡尼把握僅有機會轉身射入，但因轉身前推跌堤亞高施華被判犯規在先。兩隊半場踢成0-0。

🦁左右拉扯
下半場，車路士增加左路攻勢，奧度爾更多時間引球向前，牽引了熱刺後防，加上本身右路嘅拉扯，球隊製造到進攻空間，製造了打開記錄嘅「世界波」入球。47分鐘，奧度爾將波從左路轉移至右路俾到施耶治，加上曼治同艾斯派古達右路插前牽引，熱刺後防跟隨橫移，施耶治反方向內切一推一射，皮球彎入死角，車仔領先1-0。其後一次左路罰球，曼治傳中助攻堤亞高施華頂入拉開記錄。
🐔加強火力
熱刺落後之下，干地轉陣成433，以盧卡斯同史基普入替薛施隆同坦根加，「四閘」中兩人被換出，杜靴迪從右中場退後成為右閘。不久之後嘅左路反擊，哈里簡尼傳中，盧卡斯衝頂不成比亞芬接著補射，可見轉陣嘅效果。不過，車路士領先兩球後，杜曹已經安排了球隊更多收縮防守，令熱刺轉陣後進攻依然困難，未能取得入球，比數最終維持喺0-2完場。

🦁🐔總結
今場熱刺於體能劣勢之下，難免受壓。重兵布防可見干地及其團隊嘅心思，可惜似乎過於保守，重兵布防「過重」，反擊火力不足，而轉陣加強火力為時已晚。

車路士方面，捷維爾同占士兩位翼衛受傷缺陣，加上眾將疲態，車路士戰績下滑。從放假到今場大戰主動出擊嘅佈陣，杜曹同教練團隊似乎希望藉勝利扭轉球隊走勢同士氣，最終亦成功了，相信兩星期歇冬期後，球隊表現將會回升。

如果喜歡我們的文章，請即分享到︰